Служба новомученикам и исповедникам Санкт-Петербургской митрополии

ноября 2022

Служба новомученикам и исповедникам Санкт-Петербургской митрополии совершается 31 октября/13 ноября.

День празднования установлен на заседании архиерейского совета митрополии 1 июля 2022 года.

Служба утверждена Синодальной богослужебной комиссией и рекомендована к печати в епархиальных изданиях.

Служба новомученикам и исповедникам

Санкт-Петербургской митрополии

Санкт-Петербург

2022 год

По благословению митрополита Санкт-Петербургского и Ладожского ВАРСОНОФИЯ

Служба составлена богослужебной комиссией Санкт-Петербургской епархии и одобрена Синодальной богослужебной комиссией 25 мая 2022 года

Служба новомучеником и исповедником

Санкт-Петербургския митрополии

Поется месяца октоврия в 31-й день.

На велицей вечерни

Блажен муж: 1-й антифон.

На Господи, воззвах: стихиры на 8, глас 1.

Прииди́те, ве́рнии, соста́вим лик,/ торжеству́юще и Бо́га прославля́юще,/ в све́тлый пра́здник новому́чеников и испове́дников гра́да на́шего,/ ве́ры ра́ди Правосла́вныя пострада́вших да́же до кро́ве,/ и к покая́нию нас при́сно призыва́ющих./ Ти́и бо Христа́ Бо́га мо́лят непреста́нно// о спасе́нии душ на́ших. (Дважды)

Вас, новому́ченицы Петербу́ргстии,/ ни скорбь, ни теснота́,/ ни глад, ни гоне́ния, ниже́ ра́ны/ разлучи́ти от Бо́га возмого́ша:/ оба́че любо́вию к Нему́ смерть презре́ли есте́./ Те́мже, Небе́снаго Ца́рствия насле́дницы су́ще,/ непреста́нно моли́теся// дарова́ти душа́м на́шим мир и ве́лию ми́лость. (Дважды)

Пресла́внии священному́ченицы,/ вы же́ртву безкро́вную пре́жде благогове́йне соверша́юще,/ по́слежде, я́ко всепло́дие,/ себе́ сами́х в же́ртву живу́ю принесо́сте,/ моля́щеся, да прости́тся грех богобо́рчества наро́да на́шего./ И ны́не Христу́, святи́и, моли́теся// дарова́ти сро́дником ва́шим мир и ве́лию ми́лость. (Дважды)

В ми́ре ско́рбни бу́дете, рече́ Госпо́дь,/ предвозвеща́я ра́дость Небе́сную./ Сие́ вои́стину на вас испо́лнися,/ я́ко ско́рби мно́гия о Госпо́де,/ я́же претерпе́ли есте́ в житии́ ва́шем,/ в ра́дость ве́чную душ ва́ших приложи́шася./ Испроси́те и нам, новому́ченицы святи́и,/ си́лу вся ско́рби му́жественне претерпева́ти// и спасти́ся душа́м на́шим. (Дважды)

Слава, глас 8:

Прииди́те, ве́рнии,/ благода́рственную песнь принесе́м Триипоста́сному Бо́гу,/ дарова́вшему нам но́вых му́чеников и испове́дников,/ изря́дных пропове́дников Боже́ственнаго Ева́нгелия,/ до́брых па́стырей слове́сных ове́ц,/ преподо́бных и пра́ведных, ду́ши своя́ за Христа́ положи́вших и ве́ру соблю́дших,/ те́плых на́ших моли́твенников и усе́рдных хода́таев,/ и с любо́вию вси возопи́им:/ Госпо́ди, моли́твами и предста́тельством уго́дников Твои́х// поми́луй и спаси́ ду́ши на́ша.

И ныне, Богородичен, глас тойже:

Царь Небе́сный за человеколю́бие на зе́мли яви́ся,/ и с челове́ки поживе́,/ от Де́вы бо Чи́стыя плоть прие́мый/ и из Нея́ проше́дый с восприя́тием./ Еди́н есть Сын, сугу́б естество́м,/ но не Ипоста́сию./ Те́мже соверше́нна Того́ Бо́га/ и соверше́нна Челове́ка вои́стину пропове́дающе,/ испове́дуем Христа́ Бо́га на́шего:/ Его́же мо́ли, Ма́ти Безневе́стная,// поми́ловатися душа́м на́шим.

Вход. Прокимен дне. И чтения три.

Пророчества Исаиина чтение (глава 43):

Та́ко глаго́лет Госпо́дь: вси язы́цы собра́шася вку́пе, и соберу́тся кня́зи от них. Кто возвести́т сия́ в них? Или́ я́же от нача́ла, кто слы́шана сотвори́т вам? Да приведу́т свиде́тели своя́, и оправдя́тся, и да услы́шат, и да реку́т и́стину. Бу́дите Ми свиде́тели, и Аз Свиде́тель, глаго́лет Госпо́дь Бог, и о́трок, Его́же избра́х. Да позна́ете, и ве́руете Ми, и разуме́ете, я́ко Аз есмь, пре́жде Мене́ не бысть ин бог и по Мне не бу́дет. Аз есмь Бог, и несть ра́зве Мене́ спаса́яй. Аз возвести́х и спасо́х; уничижи́х, и не бе в вас чу́ждий. Вы Мне свиде́тели, и Аз Госпо́дь Бог, и еще́ от нача́ла Аз есмь, и несть от рук Мои́х избавля́яй. Сотворю́, и кто отврати́т то? Си́це глаго́лет Госпо́дь Бог, избавля́яй вас, Святы́й Изра́илев.

Премудрости Соломоновы чтение (глава 3):

Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их. И е́же от нас ше́ствие сокруше́ние, они́ же суть в ми́ре. И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бог искуси́ я́ и обре́те их досто́йны Себе́. Я́ко зла́то в горни́ле, искуси́ их и, я́ко всепло́дие же́ртвенное, прия́т я́. И во вре́мя посеще́ния их возсия́ют и, я́ко и́скры по сте́блию, потеку́т. Су́дят язы́ком и облада́ют людьми́, и воцари́тся Госпо́дь в них во ве́ки. Наде́ющиися Нань разуме́ют и́стину, и ве́рнии в любви́ пребу́дут Ему́. Я́ко благода́ть и ми́лость в преподо́бных Его́, и посеще́ние во избра́нных Его́.

Премудрости Соломоновы чтение (глава 5):

Пра́ведницы во ве́ки живу́т, и в Го́споде мзда их, и попече́ние их у Вы́шняго. Сего́ ра́ди прии́мут ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я́ и мы́шцею защити́т их. Прии́мет всеору́жие рве́ние свое́ и вооружи́т тварь в месть враго́м. Облече́тся в броня́ пра́вды и возложи́т шлем суд нелицеме́рен. Прии́мет щит непобеди́мый преподо́бие, поостри́т же напра́сный гнев во ору́жие, спобо́рет же с ним мир на безу́мныя. По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т. И от каменоме́тныя я́рости испо́лнь паду́т гра́ды, вознегоду́ет на них вода́ морска́я, ре́ки же потопя́т я́ на́гло. Сопроти́в ста́нет им Дух си́лы и, я́ко ви́хор, разве́ет их. И опустоши́т всю зе́млю беззако́ние, и злоде́йство преврати́т престо́лы си́льных. Слы́шите у́бо, ца́рие, и разуме́йте, навы́кните, судии́ конце́в земли́. Внуши́те, держа́щии мно́жества и гордя́щиися о наро́дех язы́к, я́ко дана́ есть от Го́спода держа́ва вам и си́ла от Вы́шняго.

На литии стихира храма.

Слава, новомучеников, глас 2:

О, святи́и новому́ченицы Петербу́ргстии,/ в годи́ну лихоле́тий/ лжепа́стыри льсти́выя изобличи́вше,/ ве́рность Це́ркви Христо́вей сохрани́ли есте́/ и, святы́ни на поруга́ние не да́вше,/ кровь свою́ за Христа́ пролия́ли есте́,/ те́мже к вам усе́рдно взыва́ем:/ моли́теся ко Го́споду,/ страну́ на́шу в ми́ре сохрани́ти// и спасти́ ду́ши на́ша.

И ныне, Богородичен, глас тойже:

О, чудесе́ но́ваго, всех дре́вних чуде́с!/ Кто бо позна́ Ма́терь, без му́жа ро́ждшую/ и на руку́ нося́щую всю тварь Содержа́щаго?/ Бо́жие есть изволе́ние Ро́ждшееся./ Его́же я́ко Младе́нца, Пречи́стая, Твои́ма рука́ма носи́вшая/ и Ма́терне дерзнове́ние к Нему́ иму́щая,/ не преста́й моля́щи о чту́щих Тя,// уще́дрити и спасти́ ду́ши на́ша.

Прошение на литии:

Спаси́, Бо́же, лю́ди Твоя́ и благослови́ достоя́ние Твое́, посети́ мир Твой ми́лостию и щедро́тами, возвы́си рог христиа́н правосла́вных и низпосли́ на ны ми́лости Твоя́ бога́тыя: моли́твами Всепречи́стыя Влады́чицы на́шея Богоро́дицы и Присноде́вы Мари́и: си́лою Честна́го и Животворя́щаго Креста́, предста́тельствы честны́х Небе́сных Сил безпло́тных, честна́го сла́внаго Проро́ка, Предте́чи и Крести́теля Иоа́нна: святы́х сла́вных и всехва́льных первоверхо́вных апо́стол Петра́ и Па́вла, свята́го апо́стола Андре́я Первозва́ннаго и про́чих всех святы́х апо́стол, и́же во святы́х оте́ц на́ших и вселе́нских вели́ких учи́телей и святи́телей, Васи́лия Вели́каго, Григо́рия Богосло́ва и Иоа́нна Златоу́стаго; и́же во святы́х отца́ на́шего Никола́я, архиепи́скопа Мир Лики́йскаго, Чудотво́рца; святы́х равноапо́стольных Мефо́дия и Кири́лла, учи́телей Слове́нских; святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших, святи́теля Михаи́ла, пе́рваго митрополи́та Ки́евскаго, первосвяти́телей Моско́вских и всея́ Руси́ Петра́, Алекси́я, Ио́ны, Мака́рия, Фили́ппа, И́ова, Ермоге́на и Ти́хона; святы́х, в земли́ Санкт-Петербу́ргстей просия́вших: Свята́го благове́рнаго вели́каго кня́зя Алекса́ндра Не́вскаго, святи́теля Игна́тия, епи́скопа Кавка́зскаго; святы́х священному́чеников Вениами́на и Серафи́ма, митрополи́тов Петрогра́дских, Влади́мира, митрополи́та Ки́евскаго, Кири́лла, митрополи́та Каза́нскаго, Иларио́на, архиепи́скопа Вере́йскаго, Никола́я, архиепи́скопа Великоу́стюжскаго, Григо́рия, епи́скопа Шлиссельбу́ргскаго, Плато́на, епи́скопа Ре́вельскаго, Се́ргия, епи́скопа На́рвскаго, Си́мона, епи́скопа Уфи́мскаго; и святы́х священному́чеников Иоа́нна Царскосе́льскаго, Алекса́ндра, Алекса́ндра, Алекси́я, Васи́лия, Виктори́на, Влади́мира, Влади́мира, Григо́рия, Григо́рия, Емелиа́на, Иоа́нна, Иоа́нна, Ка́рпа, Михаи́ла, Никола́я, Никола́я, Никола́я, Никола́я, Никола́я, Никола́я, Па́вла, Петра́, Се́ргия, Филосо́фа пресви́теров, Ники́ты диа́кона; свята́го священноиспове́дника Михаи́ла пресви́тера; преподо́бных и богоно́сных оте́ц на́ших Анто́ния Ды́мскаго, Арсе́ния Коне́вскаго, Алекса́ндра Сви́рскаго, Мака́рия Ри́млянина, Новгоро́дскаго, Марти́рия Зелене́цкаго, Серафи́ма Вы́рицкаго, святы́х преподобному́чеников Арсе́ния, Льва, Серафи́ма, Се́ргия; святы́х преподобному́чениц вели́кия княги́ни Елисаве́ты, Иоанни́кии, Мари́и; свята́го преподобноиспове́дника Аре́фы; святы́х и добропобе́дных му́чеников Бори́са, Иоа́нна, Никола́я, Ю́рия; святы́х му́чениц А́нны, Екатери́ны, Ки́ры; святы́я блаже́нныя ма́тери на́шея Ксе́нии Петербу́ргския, свята́го пра́веднаго отца́ на́шего Иоа́нна Кроншта́дтскаго, святы́х страстоте́рпцев Импера́тора Никола́я, Императри́цы Алекса́ндры, цесаре́вича Алекси́я, вели́ких княже́н О́льги, Татиа́ны, Мари́и и Анастаси́и, свята́го страстоте́рпца врача́ Евге́ния, и всех новому́чеников и испове́дников Санкт-Петербу́ргских, и́хже па́мять ны́не соверша́ем, святы́х пра́ведных Богооте́ц Иоаки́ма и А́нны и всех святы́х, мо́лим Тя, Многоми́лостиве Го́споди, услы́ши нас гре́шных, моля́щихся Тебе́, и поми́луй нас.

Молитва на литии:

Влады́ко Многоми́лостиве, Го́споди, Иису́се Христе́ Бо́же наш, моли́твами Всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Сил безпло́тных, честна́го сла́внаго Проро́ка, Предте́чи и Крести́теля Иоа́нна, святы́х сла́вных и всехва́льных апо́стол, святы́х сла́вных и добропобе́дных му́чеников, преподо́бных и богоно́сных оте́ц на́ших и всех новому́чеников и испове́дников Санкт-Петербу́ргских, и́хже па́мять ны́не соверша́ем, святы́х пра́ведных Богооте́ц Иоаки́ма и А́нны и всех святы́х Тво́их, благоприя́тну сотвори́ моли́тву на́шу, да́руй нам оставле́ние прегреше́ний на́ших, покры́й нас кро́вом крилу́ Твое́ю, отжени́ от нас вся́каго врага́ и супоста́та, умири́ на́шу жизнь, Го́споди, поми́луй нас и мир Твой, и спа́си ду́ши на́ша, я́ко Благ и Человеколю́бец.

На стиховне стихиры, глас 2.

Подобен: Егда от Древа:

Егда́ законопресту́пнии лю́дие,/ зло́бою неве́рия ослепле́ннии,/ в темни́цы мра́чныя вас всади́ша/ и непра́вдою на смерть осуди́ша,/ тогда́, страстоте́рпцы святи́и,/ любо́вию ко Христу́ распаля́емии,/ си́це глаго́ласте:/ Бо́же, в по́мощь на́шу вонми́,// Госпо́ди, помощи́ нам потщи́ся.

Стих: Воззва́ша пра́веднии,// и Госпо́дь услы́ша их.

Егда́ безбо́жнии мучи́телие,/ беззако́нное веле́ние исполня́юще,/ ру́ки своя́ на вас возложи́ша/ и, я́ко злоде́ев, на смерть ведо́ша,/ тогда́, святи́и испове́дницы,/ ве́рою в Сы́на Бо́жия укрепля́еми/ и у́мными очесы́ на по́двиг Его́ взира́юще,/ страда́ний лю́тых не убоя́стеся// и, я́ко же́ртва свяще́нная, Бо́гу принесо́стеся.

Стих: Мно́ги ско́рби пра́ведным,// и от всех их изба́вит я́ Госпо́дь.

Егда́ нечести́вии уби́йцы,/ жесто́кими ра́нами вас уязви́вше,/ в ров сме́ртный вверга́ху/ и безче́стно земле́ю погреба́ху,/ тогда́, стастоте́рпцы сла́внии,/ страда́ния лю́тая претерпева́юще,/ о́браз му́жества показа́ли есте́/ и, телесы́ свои́ми в земли́ су́ще,// душа́ми в Ца́рствии Небе́снем процвели́ есте́.

Слава, глас 8:

О, лю́дие, ве́ру оте́ческую презре́вшии!/ Ка́мо веде́те нас, я́ко разбо́йников?/ Почто́ ру́ки своя́ на нас простира́ете/ и ра́нами жесто́кими нас уязвля́ете?/ Почто́ нас в ро́ве сме́ртнем полага́ете/ и земле́ю покрыва́ете?/ Не ве́даете у́бо, что творите́,/ си́це страда́льцы кро́тко глаго́лаху,// ду́ши своя́ Го́сподеви предаю́ще.

И ныне, Богородичен, глас тойже:

Безневе́стная Де́во,/ я́же Бо́га неизрече́нно заче́нши пло́тию,/ Ма́ти Бо́га Вы́шняго,/ Твои́х рабо́в мольбы́ приими́, Всенепоро́чная,/ всем подаю́щи очище́ние прегреше́ний,/ ны́не на́ша моле́ния прие́млющи,// моли́ спасти́ся всем нам.

На благословении хлебов тропарь новомученикам, дважды, и Богородице, Дево: единожды.

Тропарь, глас 4:

Добропобе́днии новому́ченицы и испове́дницы,/ благоче́стия пра́вило и жития́ ева́нгельскаго о́браз яви́ли есте́,/ лесть богобо́рчества отве́ргше,/ ве́ру Правосла́вную сохрани́ли есте́,/ пострада́вше да́же до кро́ве/ и ле́ствицею муче́ний ко Го́споду востекли́ есте́,/ Его́же моли́те сохрани́ти град наш от вся́каго зла,/ Русь Святу́ю утверди́ти в Правосла́вии// и спасти́ ду́ши на́ша.

Ин тропарь, глас 4:

Днесь лику́ет град свята́го Петра́,/ прославля́я новому́ченики и испове́дники своя́./ Ти́и бо лесть богобо́рчества отве́ргше,/ пострада́ша за ве́ру да́же до кро́ве/ и, ле́ствицею муче́ний ко Го́споду востека́юще,/ Ца́рствия Небе́снаго пресла́вно достиго́ша./ Сего́ ра́ди непреста́нно Христа́ Бо́га мо́лят/ сохрани́ти страну́ на́шу от вся́каго зла// и спасти́ ду́ши на́ша.

На утрени

На Бог Господь: тропарь новомученикам, дважды.

Слава, и ныне, Богородичен, глас тойже:

Е́же от ве́ка утае́нное/ и А́нгелом несве́домое та́инство,/ Тобо́ю, Богоро́дице, су́щим на земли́ яви́ся Бог,/ в несли́тнем соедине́нии воплоща́емь,/ и Крест во́лею нас ра́ди восприи́м,/ и́мже воскреси́в первозда́ннаго,// спасе́ от сме́рти ду́ши на́ша.

По 1-м стихословии седален, глас 3:

Весели́ся днесь, гра́де свята́го Петра́, име́я те́плыя моли́твенники, но́выя страда́льцы за ве́ру Христо́ву, по́двиги свои́ми преде́лы твоя́ освяти́вшия. Ти́и бо житие́м свои́м и богому́дрыми словесы́ пле́велы раско́ла исто́ргше, о́браз благоче́стия и правосла́внаго испове́дания в сердца́х ве́рных насади́ша и благо́е украше́ние гра́ду на́шему яви́шася. Те́мже, па́мять их соверша́юще, Бо́га, ди́внаго во святы́х Свои́х, в пе́ниих просла́вим. (Дважды)

Слава, и ныне, Богородичен:

Спору́чнице гре́шных и Уте́шительнице скорбя́щих, Пречи́стая Ма́ти Бо́жия, град наш ико́нами Твои́ми украси́вшая и святы́х мно́жество в нем воспита́вшая, Твои́ми ко Христу́ моли́твами спаси́ ду́ши на́ша.

По 2-м стихословии седален, глас 5:

Новому́ченицы сла́внии, мраз претерпе́вшии, и в темни́цах лю́тых заточе́ние прии́мшии! А́ще и от ору́жных умерщвле́ни бы́сте те́лом, оба́че ду́хом ко́зни диа́вольския посрами́ли есте́, име́юще Христа́ прибе́жище и утвержде́ние. (Дважды)

Слава, и ныне, Богородичен:

Не и́мамы ина́го прибе́жища, ра́зве Тебе́, Богоро́дице, Оте́чества на́шего усе́рдная Засту́пнице: всяк бо, почита́яй Тя, наде́жду обрета́ет.

Величание:

Велича́ем вас,/ святи́и новому́ченицы и испове́дницы земли́ на́шея,/ и чтем честна́я страда́ния ва́ша,// я́же за Христа́ претерпе́ли есте́.

Псалом избранный:

Бог нам Прибе́жище и Си́ла.

Помо́щник в ско́рбех обре́тших ны зело́.

Сего́ ра́ди не убои́мся, внегда́ смуща́ется земля́.

Я́ко Тебе́ ра́ди умерщвля́еми есмы́ весь день.

По полиелеи седален, глас 1:

До́блии страда́льцы и ве́рнии свиде́телие ве́ры Христо́вы, Це́ркве Ру́сския похвало́ и гра́ду на́шему утвержде́ние, ны́не, пра́зднующе ва́шу па́мять, Бо́гу, просла́вльшему вас, благода́рственно вопие́м: сла́ва Да́вшему вам кре́пость во страда́ниих, сла́ва Венча́вшему вас, сла́ва Спаса́ющему нас моли́твами ва́шими. (Дважды)

Слава, и ныне, Богородичен:

Засту́пнице усе́рдная, Моли́твеннице о ро́де христиа́нстем, приими́ моли́твы раб Тво́их и покры́й град наш покро́вом Твоея́ бла́гости.

Степенна, 1-й антифон 4-го гласа. Прокимен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Евангелие от Матфея, зачало 36.

По 50-м псалме, Слава: Моли́твами святы́х новому́чеников и испове́дников земли́ на́шея: И ныне: Моли́твами Богоро́дицы:

Стихира, глас 6:

Гра́да на́шего украше́ние,/ Це́ркве Ру́сския све́тлую похвалу́,/ Правосла́вия тве́рдыя побо́рники,/ благоче́стия и́стинныя ревни́тели,/ раско́лов и нече́стия искорени́тели,/ днесь восхва́лим, ве́рнии,/ новому́ченики и испове́дники добропобе́дныя// и те́плыя о нас пред Бо́гом моли́твенники.

Канон Богородицы со ирмосом на 6. И новомучеников на 8.

Канон Богородицы. Глас 8.

Песнь 1

Ирмос: Во́ду проше́д я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Припев: Пресвята́я Богоро́дице, спаси́ нас.

Мно́гими содержи́мь напа́стьми, к Тебе́ прибега́ю, спасе́ния иски́й: о Ма́ти Сло́ва и Де́во, от тя́жких и лю́тых мя спаси́.

Страсте́й мя смуща́ют прило́зи, мно́гаго уны́ния испо́лнити мою́ ду́шу; умири́, Отрокови́це, тишино́ю Сы́на и Бо́га Твоего́, Всенепоро́чная.

Спа́са ро́ждшую Тя и Бо́га, молю́, Де́во, изба́витися ми лю́тых; к Тебе́ бо ны́не прибега́я, простира́ю и ду́шу и помышле́ние.

Неду́гующа те́лом и душе́ю, посеще́ния Боже́ственнаго и промышле́ния от Тебе́ сподо́би, еди́на Богома́ти, я́ко блага́я, Блага́го же Роди́тельница.

Ин канон новомучеников. Глас 4.

Песнь 1

Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовал Изра́иль,/ крестообра́зныма Моисе́овыма рука́ма// Амали́кову си́лу в пу́стыни победи́л есть.

Припев: Святи́и новому́ченицы и испове́дницы земли́ на́шея, моли́те Бо́га о нас.

О, святи́и новому́ченицы и испове́дницы земли́ на́шея, вмени́стеся я́ко о́вцы заколе́ния, и, я́коже а́гнцы непоро́чнии, Бо́гу поже́ршеся, за уби́йцы ва́ша кро́тко моли́стеся. Сего́ ра́ди и А́гнец Бо́жий, взе́мляй грехи́ ми́ра, прия́т вас во дворы́ Своя́.

Же́ртвенную любо́вь яви́л еси́, святи́телю Вениами́не, тве́рдостию ума́ показа́лся еси́ непоколеби́мь, святы́ню церко́вную на поруга́ние враго́м не пре́дал еси́. Те́мже к све́ту невече́рнему прише́л еси́, священному́чениче, ра́дуяся, иде́же мо́лишися о спасе́нии душ на́ших.

Святи́телю Вениами́ну после́довали есте́ о́тче Се́ргие, Ю́рие и Иоа́нне достохва́льнии, и вку́пе му́ченическими венцы́ увенча́лися есте́, те́мже ны́не ва́шу па́мять благоче́стно соверша́ем.

Богородичен: Держа́вная Влады́чице на́ша Богоро́дице, во дни гоне́ния безбо́жнаго, новому́ченики во страда́ниих за Христа́ укрепи́ла еси́, и ны́не не лиши́ нас Твоего́ Ма́терняго Заступле́ния, сохраня́ющи в ми́ре живо́т наш.

Катавасия: Отве́рзу уста́ моя́:

Песнь 3

Ирмос: Небе́снаго кру́га Верхотво́рче Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// еди́не Человеколю́бче.

Предста́тельство и покро́в жи́зни моея́ полага́ю Тя, Богороди́тельнице Де́во: Ты мя окорми́ ко приста́нищу Твоему́, благи́х вино́вна, ве́рных Утвержде́ние, еди́на Всепе́тая

Молю́, Де́во, душе́вное смуще́ние и печа́ли моея́ бу́рю разори́ти: Ты бо, Богоневе́стная, Нача́льника тишины́ Христа́ родила́ еси́, еди́на Пречи́стая.

Благоде́теля ро́ждши до́брых вино́внаго, благодея́ния бога́тство всем источи́: вся бо мо́жеши, я́ко си́льнаго в кре́пости Христа́ ро́ждши, Богоблаже́нная.

Лю́тыми неду́ги и боле́зненными страстьми́ истяза́ему, Де́во, Ты ми помози́: исцеле́ний бо неоску́дное Тя зна́ю Сокро́вище, Пренепоро́чная, неиждива́емое.

Ин

Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.

О, святи́и ца́рственнии страстоте́рпцы Нико́лае и Алекса́ндро! Вы до́браго супру́жества и дете́й воспита́ния благочести́ваго о́браз яви́сте, дом свой я́ко цве́тник духо́вный соде́лавше. Сего́ ра́ди ны́не вку́пе со ча́ды свои́ми Престо́лу Бо́жию предстоите́ и моли́теся о ча́дех земна́го Оте́чества ва́шего.

О, ча́да царе́вы, святи́и му́ченицы, ве́рнии раби́ Христо́ви: Алекси́е, О́льго, Татиа́но, Мари́е и Анастаси́е! Вы, за убива́ющих вас Го́споду кро́тко моля́щеся, кровь свою́ неви́нную, я́ко дар многоце́нен Бо́гу принесли́ есте́. Сего́ ра́ди вас ны́не ублажа́ем и мо́лимся о стяжа́нии кро́тости и смире́ния серде́ц на́ших.

Смире́нием, я́ко ри́зою, обле́клся еси́, врачу́ Евге́ние, ца́рственных страстоте́рпцев соу́зниче, егда́ без вины́ пре́дан был еси́ сме́рти. Те́мже велича́ем страда́ния твоя́ и песносло́вим кончи́ну твою́.

Богородичен: Засту́пницу усе́рдную восхва́лим и честно́му Ея́ поклони́мся о́бразу, и́мже благослове́ние Бо́жие гра́ду свята́го Петра́ дарова́ся, и в годи́ну лю́тую земли́ на́шея кре́пкое бысть огражде́ние.

Седален, глас 8:

Святи́телие Христо́ви, свяще́нницы честни́и, ца́рственнии страстоте́рпцы, преподо́бнии и пра́веднии, в земли́ Петербу́ргстей благоче́стием процве́тшии, в годи́ну безбо́жия плод ве́ры Бо́гу прине́сшии и венцы́ му́ченическия от Христа́ Спа́са улучи́вшии, к вам я́ко ча́да ва́ша духо́вная прибега́ем ны́не, вы бо те́плии моли́твенницы о спасе́нии душ на́ших. (Дважды)

Слава, и ныне, Богородичен:

О, Всепе́тая Богоро́дице Влады́чице, испове́дников похвало́, му́чеников сла́во, А́нгелы восхваля́емая и челове́ки воспева́емая, и всего́ ми́ра кре́пкая Помо́щнице, изба́ви Це́рковь Ру́сскую вся́каго зла́го обстоя́ния, Еди́на Благослове́нная.

Песнь 4

Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́,// и просла́вих Твое́ Божество́.

Страсте́й мои́х смуще́ние, Ко́рмчию ро́ждшая Го́спода, и бу́рю утиши́ мои́х прегреше́ний, Богоневе́стная.

Милосе́рдия Твоего́ бе́здну призыва́ющу пода́ждь ми, Я́же Благосе́рдаго ро́ждшая, и Спа́са всех пою́щих Тя.

Наслажда́ющеся, Пречи́стая, Твои́х дарова́ний, благода́рственное воспева́ем пе́ние, ве́дуще Тя Богома́терь.

На одре́ боле́зни моея́ и не́мощи низлежа́щу ми, я́ко благолюби́ва, помози́, Богоро́дице, еди́на Присноде́во.

Ин

Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

В вертогра́де духо́внем земли́ Петербу́ргския взра́щен, Це́рковь Ру́сскую во дни гоне́ний лю́тых возгла́вил еси́, святи́телю Ти́хоне, кре́пкое в ней стоя́ние свиде́тельствовал еси́ и па́ству твою́ неврежде́нну от наве́тов вра́жиих до́бре соблю́л еси́.

Сла́внаго па́стыря Кроншта́дтскаго собесе́дниче, священному́чениче Кири́лле, лесть вра́жию му́жески попра́в и страда́ния мно́гая претерпе́в, в темни́цу за Христо́м после́довал еси́ и о́браз побе́ды духо́вныя яви́л еси́.

Саро́вскому чудотво́рцу тезоимени́тый, священному́чениче Серафи́ме, благоче́стия учи́телю и еди́нства церко́внаго побо́рниче, те́мже и пострада́л еси́ да́же до кро́ве. Моли́ Христа́ Бо́га еди́нство нам сохрани́ти и серафи́мския ра́дости прича́стники яви́тися.

Богородичен: Ди́вно украси́ся Ла́вра Не́вская ико́ною Твое́ю, Богоро́дице Влады́чице, ю́же благоволи́ла еси́ да́ти ве́рным в по́мощь и утеше́ние, ско́ро бо слы́шиши мольбы́ в ско́рбех Тя призыва́ющих.

Песнь 5

Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,// Человеколю́бче.

Испо́лни, Чи́стая, весе́лия се́рдце мое́, Твою́ нетле́нную даю́щи ра́дость, весе́лия ро́ждшая Вино́внаго.

Изба́ви нас от бед, Богоро́дице Чи́стая, ве́чное ро́ждши Избавле́ние, и Мир, всяк ум преиму́щий.

Разреши́ мглу прегреше́ний мои́х, Богоневе́сто, просвеще́нием Твоея́ све́тлости, Свет ро́ждшая Боже́ственный и преве́чный.

Исцели́, Чи́стая, души́ моея́ неможе́ние, посеще́ния Твоего́ сподо́бльшая, и здра́вие моли́твами Твои́ми пода́ждь ми.

Ин

Ирмос: Ты, Го́споди, мой Свет,/ в мир прише́л еси́,/ Свет Святы́й,/ обраща́яй из мра́чна неве́дения// ве́рою воспева́ющия Тя.

Новому́чениче Петрогра́дский Пе́тре, ка́меню драги́й и сла́вный Це́ркве Ру́сския, служи́телю ве́рный Цари́цы Богоро́дицы, ты, ре́вностию Боже́ственною распаля́емь, безу́мие безбо́жников изобличи́л еси́ и кровь за Христа́ пролия́л еси́.

Богодухнове́нне пропове́дниче, священному́чениче Филосо́фе, гра́да на́шего похвало́, из благотворя́щаго се́рдца твоего́ ре́ки воды́ живы́я истеко́ша, ду́ши и телеса́ жа́ждущих росо́ю благода́ти напая́юще, утоли́ днесь печа́ли душ на́ших те́плыми твои́ми моли́твами.

Ча́да твоя́, Никола́я и Бори́са, до́бре воспита́л еси́, па́стырю блаже́нне Филосо́фе, я́же с тобо́ю вку́пе на по́двиг востеко́ша и венце́м му́ченическим Христа́ Влады́ки украси́шася, те́мже и мо́лятся о ча́дех земна́го своего́ Оте́чества.

Богородичен: О Де́во Богороди́тельнице, оби́димых Засту́пнице и всех скорбя́щих Ра́досте! Приими́ благода́рственное на́ше пе́ние и бу́ди нам те́плая Хода́таица у Престо́ла Сы́на Твоего́ и Бо́га на́шего.

Песнь 6

Ирмос: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся я́ко Ио́на:// от тли, Бо́же, возведи́ мя.

Сме́рти и тли я́ко спасл есть, Сам Ся изда́в сме́рти, тле́нием и сме́ртию мое́ естество́ я́то бы́вшее, Де́во, мо́ли Го́спода и Сы́на Твоего́, враго́в злоде́йствия мя изба́вити.

Предста́тельницу Тя живо́та вем, и Храни́тельницу тве́рду, Де́во, и напа́стей реша́щу молвы́, и нало́ги бесо́в отгоня́ющу; и молю́ся всегда́, от тли страсте́й мои́х изба́вити мя.

Я́ко сте́ну прибе́жища стяжа́хом, и душ всесоверше́нное спасе́ние, и простра́нство в ско́рбех, Отрокови́це, и просвеще́нием Твои́м при́сно ра́дуемся: о Влады́чице, и ны́не нас от страсте́й и бед спаси́.

На одре́ ны́не немощству́яй лежу́, и несть исцеле́ния пло́ти мое́й; но Бо́га и Спа́са ми́ру, и Изба́вителя неду́гов ро́ждшая, Тебе́ молю́ся Благо́й: от тли неду́г возста́ви мя.

Ин

Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х// исте́кшею Кро́вию.

До́блестный страда́льче и священному́чениче Иоа́нне Царскосе́льский, пе́рвый в новому́ченицех Петербу́ргстих яви́лся еси́, моли́ Влады́ку Христа́ Бо́га сохрани́тися Оте́честву на́шему от междоусо́бныя бра́ни и спасти́ся душа́м на́шим.

Бра́тства церко́вная устроя́я, преподобному́чениче Льве, благоде́тель неусы́пный и помо́щник ни́щим и стра́нным, си́рым и стра́ждущим показа́лся еси́, те́мже, Ца́рствие Небе́сное унасле́довав, мо́лишися о братолю́бии па́мять твою́ воспева́ющих.

Бо́льши сея́ никто́же любве́ и́мать, да кто ду́шу свою́ положи́т за дру́ги своя́. Си́це у́бо и ты, священному́чениче Алекси́е Петрогра́дский, за собра́та жизнь отда́в свою́, в же́ртву Бо́гови прине́слся еси́.

Богородичен: Ико́ною Твое́ю Зна́мение, Ма́ти Де́во, в Ца́рстем Селе́ во дни губи́тельных пове́трий исцеле́ние мно́гим дарова́ла еси́, ны́не же, во гра́де свята́го Петра́ Духо́вный цве́тник красу́ется, име́я ю я́ко Боже́ственное сокро́вище, Ты бо, Пречи́стая, всех притека́ющих к Тебе́ ско́рая еси́ Помо́щница.

Кондак, глас 3:

Днесь па́мять новому́чеников и испове́дников Петербу́ргских соверша́юще,/ припаде́м ко Го́споду и возопи́им:/ Христе́ Бо́же, тех моли́твами умири́ мир Твой,// и спаси́ ду́ши на́ша, я́ко Благ и Человеколю́бец.

Икос:

Егда́ на́йде на Зе́млю Ру́сскую годи́на гоне́ний лю́тых и испыта́ний час, не оскуде́ тогда́ моли́тва и не исся́кну по́двиг любве́ и творе́ния до́брых дел, мно́жество бо восста́ша новоявле́нных подви́жник в земли́ Петербу́ргстей, убагри́вше ю́ то́ком крове́й свои́х. Прииди́те у́бо, мучениколю́бцы, подвиго́м их подража́юще, с любо́вию возопие́м: Христе́ Бо́же, умири́ мир Твой, и спаси́ ду́ши на́ша, я́ко Благ и Человеколю́бец.

Песнь 7

Ирмос: От Иуде́и доше́дше о́троцы,/ в Вавило́не иногда́,/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

На́ше спасе́ние я́коже восхоте́л еси́, Спа́се, устро́ити, во утро́бу Де́выя всели́лся еси́, Ю́же ми́ру Предста́тельницу показа́л еси́: оте́ц на́ших Бо́же, благослове́н еси́.

Воли́теля ми́лости, Его́же родила́ еси́, Ма́ти Чи́стая, умоли́ изба́витися от прегреше́ний и душе́вных скверн ве́рою зову́щим: оте́ц на́ших Бо́же, благослове́н еси́.

Сокро́вище спасе́ния и исто́чник нетле́ния, Тя ро́ждшую, и столп утвержде́ния, и дверь покая́ния, зову́щим показа́л еси́: оте́ц на́ших Бо́же, благослове́н еси́.

Теле́сныя сла́бости и душе́вныя неду́ги, Богороди́тельнице, любо́вию приступа́ющих к кро́ву Твоему́, Де́во, исцели́ти сподо́би, Спа́са Христа́ нам ро́ждшая.

Ин

Ирмос: В пещи́ авраа́мстии о́троцы перси́дстей,/ любо́вию благоче́стия па́че/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоея́, Го́споди.

Священному́чениче Нико́лае, сподви́жниче чудотво́рца Кроншта́дтскаго. Любо́вию Христо́вою распаля́емь, отца́ своего́ духо́внаго пред лице́м сме́рти не отве́рглся еси́. И ны́не, во дво́рех Бо́га на́шего водворя́яся, не забу́ди нас, пою́щих: отце́в на́ших, Бо́же, благослове́н еси́.

Священному́чениче Ка́рпе, тве́рдый адама́нте ве́ры Христо́вы! Ты па́ству хра́ма Иси́доровскаго во гра́де свята́го Петра́ до́бре упа́сл еси́ и му́жественне за Христа́ пострада́л еси́. Ны́не же с ли́ки святы́х воспева́еши: отце́в на́ших, Бо́же, благослове́н еси́.

Земля́ Петербу́ргская освяти́ся, напита́вшися кро́вьми ва́шими, и пу́стошь Левашо́вская облагоуха́ся, прии́мше телеса́ ва́ша, новому́ченицы многочи́сленнии, во страда́ниих ко Го́споду взыва́вшии: отце́в на́ших, Бо́же, благослове́н еси́.

Богородичен: Твое́ю всечестно́ю ико́ною Ти́хфинскою, ю́же земля́ на́ша, я́ко не́кий дар Боже́ственный, свы́ше благогове́йно прия́т, при́сно страну́ на́шу, о, Госпоже́ Цари́це Богоро́дице, покры́й, заступи́ и спаси́ ю́ от всех наве́т вра́жиих.

Песнь 8

Ирмос: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся ве́ки.

По́мощи я́же от Тебе́ тре́бующия не пре́зри, Де́во, пою́щия и превознося́щия Тя во ве́ки.

Неможе́ние души́ моея́ исцеля́еши, и теле́сныя боле́зни, Де́во, да Тя просла́влю, Чи́стая, во ве́ки.

Исцеле́ний бога́тство излива́еши ве́рно пою́щим Тя, Де́во, и превознося́щим неизрече́нное Твое́ Рождество́.

Напа́стей Ты прило́ги отгоня́еши, и страсте́й нахо́ды, Де́во: те́мже Тя пое́м во вся ве́ки.

Ин

Ирмос: Ру́це распросте́р, Дании́л,/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:// благослови́те, вся дела́ Госпо́дня, Го́спода.

Преподобному́ченице Елисаве́то, благове́рная княги́не! Ты, я́ко Мари́я, Христу́ Бо́гу всем се́рдцем внима́ющи, и, я́ко Ма́рфа, Ему́ с любо́вию служа́щи, о́браз де́ятельнаго благоче́стия нам яви́ла еси́ и ве́ру да́же до сме́рти непоро́чно сохрани́ла еси́, пою́щи: благослови́те, вся дела́ Госпо́дня, Го́спода.

Преподобному́ченице Мари́е Га́тчинская, страда́лице преди́вная! Ты в годи́ну безбо́жия всех приходя́щих к тебе́ утеша́ла еси́ и кре́пость ве́ры и благоче́стия в житии́ твое́м яви́ла еси́, воспева́ющи: благослови́те, вся дела́ Госпо́дня, Го́спода.

Восхва́лим пе́сньми жены́ святы́я: Екатери́ну и Ки́ру, вку́пе со А́нною, ты́я бо естество́ немощно́е си́лою Бо́жиею укрепи́вше, на страда́ния устреми́шася и лику́юще взыва́ху: благослови́те, вся дела́ Госпо́дня, Го́спода.

Богородичен: Ве́мы Тя, Богоблагода́тная, ско́рое поги́бших взыска́ние, нас, немощны́х, кре́пость и утвержде́ние; те́мже зове́м Ти усе́рдно: от напа́стей и печа́ли свободи́ нас, Влады́чице, к Тебе́ прибега́ющих.

Песнь 9

Ирмос: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,// с безпло́тными ли́ки Тя велича́юще.

То́ка слез мои́х не отврати́ся, Я́же от вся́каго лица́ вся́ку сле́зу отъе́мшаго, Де́во, Христа́ ро́ждшая.

Ра́дости мое́ се́рдце испо́лни, Де́во, Я́же ра́дости прие́мшая исполне́ние, грехо́вную печа́ль потребля́ющи.

Приста́нище и предста́тельство к Тебе́ прибега́ющих бу́ди, Де́во, и стена́ неруши́мая, прибе́жище же и покро́в и весе́лие.

Све́та Твоего́ заря́ми просвети́, Де́во, мрак неве́дения отгоня́ющи, благове́рно Богоро́дицу Тя испове́дающих.

Ин

Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый растоя́щаяся естества́.// Тем веселя́щеся, Тя, Богоро́дице, велича́ем.

Святи́телие Христо́ви, блюсти́телие благоче́стия церко́внаго, сорабо́тницы святи́теля Ти́хона, па́ству в земли́ Петербу́ргстей во еди́нстве соблюдо́сте, сего́ ра́ди вас ублажа́ем.

Свяще́нницы честни́и, земли́ на́шея па́стырие до́брии, в нощи́ безбо́жия свет Христо́в ве́рным яви́вшии, зало́г, от Бо́га дарова́нный, неврежде́нно сохрани́сте, сего́ ра́ди вас почита́ем.

Святи́и новому́ченицы и испове́дницы земли́ на́шея, имену́емии и неимену́емии, явле́ннии и неявле́ннии, Бо́гом зна́емии, ва́ше о́бщее торжество́ ны́не соверша́юще, Бо́га ди́внаго во святы́х Свои́х велича́ем.

Богородичен: Град Твой сохраня́й, Богороди́тельнице, прославля́ющий новому́чеников па́мять, и под держа́вный Твой Покро́в прибега́ющим пода́ждь мир и благоде́нствие. Тем, веселя́щеся, Тя, Богоро́дице, велича́ем.

Светилен:

Ра́дуйся, сла́вный гра́де свята́го Петра́, сла́ва бо новому́чеников и испове́дников в тебе́ возсия́. Лику́йте ны́не и весели́теся, благочести́вии лю́дие, иму́ще сонм ве́лий но́вых моли́твенников и хода́таев пред Отце́м Небе́сным.

Слава, и ныне, Богородичен:

О Тебе́ хва́лимся, Богороди́тельнице, и к Бо́гу Тя и́мамы Предста́тельство, простри́ покро́в Твой святы́й на ны и умоли́ Сы́на Твоего́ и Бо́га на́шего, да спасе́т ду́ши на́ша.

На хвалитех стихиры на 4, глас 8.

Подобен: О, преславнаго чудесе:

О, пресла́внаго чудесе́!/ Днесь лику́ет земля́ Петербу́ргская/ благода́тию новому́чеников и испове́дников свои́х красу́ющися,/ и́же ду́ши своя́ за Христа́ положи́ша и ве́ру до конца́ соблюдо́ша./ Те́мже, духо́вно ра́дующеся,/ Го́спода ди́внаго во святы́х Свои́х прославля́ем и со умиле́нием взыва́ем:/ имено́вании и неимено́вании сро́дницы на́ши,/ Христа́ Бо́га моли́те// дарова́ти нам мир и ве́лию ми́лость. (Дважды)

О, пресла́внаго чудесе́!/ Новому́ченицы и испове́дницы Петербу́ргстии,/ лю́тыми страда́нии и муче́нии/ пропове́дницы всео́бщаго Воскресе́ния явля́ются/ и жесто́кия сме́рти сподобля́ются,/ оба́че Го́сподом Сил прославля́ются,/ и в Небе́снем Ца́рствии со все́ми святы́ми/ и́стее Па́схи Христо́вы причаща́ются// и мо́лятся о душа́х на́ших.

О, пресла́внаго чудесе́!/ Лик новому́чеников и испове́дников Петербу́ргских/ вку́пе с первоверхо́вным апо́столом Петро́м/ у Престо́ла Царя́ Небе́снаго за град наш мо́лится усе́рдно./ Сего́ ра́ди, любо́вию воздвиза́емии, и мы воспои́м:/ ра́дуйтеся, страстоте́рпцы Христо́ви, похвало́ на́ша и утвержде́ние!/ Христу́ Бо́гу моли́теся,/ да изба́вит нас от вся́каго зла// и спасе́т ду́ши на́ша.

Слава, глас 8:

Му́жественне крест свой на ра́мо взе́мше/ и доброде́тельми вооружи́вшеся,/ безбо́жныя наве́ты гони́телей си́лою Бо́жиею победи́ли есте́/ и му́ченическими страда́ньми боже́ственнаго приста́нища дости́гли есте́,/ иде́же от Влады́ки Христа́ ки́йждо от вас услы́ша:/ благи́й и ве́рный ра́бе,/ вни́ди в ра́дость Го́спода твоего́./ Того́ приле́жно моли́те,/ грехо́в оставле́ние нам дарова́ти// и спасе́ние душа́м на́шим.

И ныне, Богородичен, глас тойже:

Влады́чице, приими́ моли́твы раб Твои́х,/ и изба́ви нас// от вся́кия ну́жды и печа́ли.

Славословие великое и отпуст.

На Литургии

Блаженна от канона новомучеников песни 3-я и 6-я. Прокимен, глас 8: Го́споди, Тебе́ ра́ди // умерщвля́еми есмы́ весь день. Стих: Вмени́хомся я́ко о́вцы заколе́ния. Апостол к Римляном, зачало 99. Аллилуия, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь. Евангелие от Луки, зачало 106. Причастен: Ра́дуйтеся, пра́веднии о Го́споде, пра́вым подоба́ет похвала́.

Молитва

О, избра́ннии уго́дницы Христо́ви, новому́ченицы и испове́дницы Петербу́ргстии, Це́ркве Ру́сския столпи́ непоколеби́мии, земли́ на́шея похвало́, па́ствы Христо́вы предста́телие и наста́вницы!

Вы во вре́мя гоне́ния безбо́жнаго о́браз му́жественнаго и кро́ткаго стоя́ния за ве́ру яви́ли есте́, и лю́тую смерть прие́мше, в му́ченицех просия́ли есте́, апо́стольский заве́т ве́дуще: ничто́же бо разлучи́т вас от любве́ Бо́жия.

Ны́не же мы, недосто́йнии, умиле́нною душе́ю и сокруше́нным се́рдцем вас призыва́ем и те́пле вопие́м: утверди́те нас в ве́ре святе́й, научи́те нас всегда́ твори́ти во́лю Бо́жию и храни́ти за́поведи Его́. Па́стырем на́шим бу́дите пра́вило ве́ры, боля́щым вра́чеве изря́днии, печа́льным уте́шителие, гони́мым засту́пницы, ю́ным наста́вницы, нам же всем благосе́рднии и те́плии моли́твенницы.

О, добропобе́днии новому́ченицы и испове́дницы! Умоли́те Го́спода Бо́га, да соблюде́тся в ве́ре Правосла́вней Оте́чество на́ше, град наш утверди́тся до сконча́ния ве́ка и в нем досто́йно и пра́ведно прославля́ется И́мя Пресвяты́я Тро́ицы, Отца́ и Сы́на и Свята́го Ду́ха, во ве́ки веко́в. Ами́нь.

Собор новомучеников и исповедников Санкт-Петербургской митрополии:

1. Александр Волков, сщмч.: Д. 26

2. Александр Саульский, сщмч.: М.19

3. Александра, царица, страстотерпица: Ил. 4

4. Алексий, царевич, страстотерпец: Ил. 4

5. Алексий Ставровский, сщмч.: Окт. 1

6. Анастасия, великая княжна, страстотерпица: Ил. 4

7. Анна Лыкошина, мц.: С. 28

8. Арефа (Митренин),присп.: Окт. 24

9. Арсений (Дмитриев), прмч.: Н. 20

10. Борис Орнатский, мч.: М. 31

11. Василий Канделябров, сщмч.: Н.20