24 января (6 февраля) - Служба св. блж. Ксении Петербуржской в церковнославянском начертании (pdf) 24 января (6 февраля) - Служба преподобной Ксении Миласской и св. блж. Ксении Петербуржской в церковнославянском начертании (pdf)Источники: pravoslavie.ru, sbkrpc.ru
Служба св. блж. Ксении Петербургской
Месяца иануариа в 24-й день
Святыя блаженныя Ксении Петербужския, Христа ради юродивыя
На велицей вечерни
Подобен: О, преславнаго чудесе:
Блаженная Ксение богомудрая,/ чистая твоя душа,/ правоверным смыслом сияющи/ и облистающи добродетелей светлостьми,/ озаряет верных исполнение,/ бесовскую тьму отгоняющи./ Темже тя, яко причастницу/ невечерния благодати,/ ублажаем благочестно вси, досточудная.
Блаженная мати,/ основание положивши добродетели,/ древняго человека с похотьми совлекшися,/ во Христа облеклася еси воистинну./ Тем же и победила еси/ многая вражия ополчения,/ наставница была еси многим людем/ града святаго Петра,/ Ксение достохвальная.
Богоугодным житием укрепляющися,/ страсти плотския/ от души отгнала еси,/ угоднице Христова,/ темже к божественней жизни преставилася еси/ и с лики праведных водворяешися./ Сего ради почитаем тя священными песньми/ и радостно восхваляем,/ Ксение всеблаженная.
Слава, глас 6:
Кто не удивится,/ кто не прославит,/ кто не воспоет во Христе мудрое и преславное житие твое,/ мати Ксение,/ яко и по святем преставлении твоем/ подаеши притекающим верою врачевание богатное./ Темже воспеваем Благодателя Бога,/ явившаго тя, блаженную,/ ко исцелению душ и телес наших.
И ныне, Догматик.
Вход. Прокимен дне. И чтения 3 преподобническая.
На литии стихиры, глас 4:
Дал еси образ терпения и мужества,/ Преблагий Господи,/ праведную Ксению, многая чудеса источающу,/ словесы и делы сияющу,/ незлобием и кротостию украшенну./ Тем Твое неизреченное смотрение славим,/ Иисусе Всесильне,/ Спасе душ наших.
Исцеляти страсти души и тела/ дар от Бога истинно приемши,/ блаженная Ксение,/ преестественно исцеляеши вся,/ не человеческими врачевании,/ но божественными дарованьми.
Отвергши мирскую суету,/ любовию Христовою связася, Ксение блаженная,/ постническия труды и лишения претерпела еси,/ укрепляема силою от Девы Возсиявшаго./ Темже ныне водворяешися, идеже праведных селения.
Слава, глас тойже:
Воздержанием житие твое украсившая/ и уды умертвившая,/ победила еси вражия прилоги, блаженная./ Темже со всеми святыми славим/ и торжествуем священную память твою,/ просяще обрести молитвами твоими велию милость.
И ныне, глас тойже:
Свеще неугасимая,/ Престоле Господень,/ Пречистая Владычице,/ моли спастися душам нашим.
На стиховне стихиры, глас 6:
Подобен: Тридневен:
Житие твое, яко солнце,/ сердца верных озари/ и многая к покаянию приведе,/ темже и нас светом невечерним просвети,/ Ксение святая,/ всечестную твою память почитающих.
Стих: Праведницы во веки живут,/ и в Господе мзда их.
Достойне хвалима еси на земли,/ целительнице недужных, богоблаженная Ксение,/ яко и по кончине твоей усердно к тебе прибегающия/ от недуг свобождаеши./ Темже непрестанно моли/ спастися душам нашим.
Стих: Надеющиися Нань разумеют истину,/ и вернии в любви пребудут Ему.
Немощна сущи, славная,/ силою Божиею козни вражия победила еси,/ странну преходящи жизнь/ и страсти телесныя умертвивши,/ ныне на Небесех живеши,/ идеже обрела еси истинное жилище, Ксение богомудрая.
Слава, глас 4:
Ангельское житие на земли явила еси,/ Ксение всеблаженная,/ источниче умиления, милости течение,/ пучино чудес, струе исцелений,/ маслино Божия воистинну плодовита,/ елеем трудов твоих просвещающая верно хвалящих тя./ Моли Человеколюбца от бед избавити/ любовию чтущих всечестную память твою.
И ныне, глас тойже:
Теплое заступление сущим в бедах и Помощницу нашу,/ Еюже от тли избавихомся,/ Богородицу, вернии, всеусердно ублажаем.
Тропарь, глас 7:
Нищету Христову возлюбивши,/ безсмертныя трапезы ныне наслаждаешися,/ безумием мнимым безумие мира обличивши,/ смирением крестным силу Божию восприяла еси,/ сего ради дар чудодейственный помощи стяжавшая,/ Ксение блаженная,/ моли Христа Бога/ избавитися нам от всякаго зла покаянием.
Слава, и ныне, Богородичен.
На утрени
На Бог Господь: тропарь святыя дважды. Слава, и ныне, Богородичен.
По 1-м стихословии седален, глас 3:
Мирскую красоту оставила еси,/ пременивши богатство тлеющее на непреходящее, святая Ксение./ Темже со всеми святыми славим/ и торжествуем священную память твою,/ просяще обрести молитвами твоими, блаженная, велию милость.
Слава, и ныне, Богородичен:
Недомысленно и непостижимо есть, Владычице Богорадованная,/ еже соделанное о Тебе страшное Божие таинство,/ яко Необыменнаго заченши, родила еси,/ плотию обложена от Пречистых Кровей Твоих./ Егоже, Благодатная, яко Сына Твоего и Бога, моли/ спастися душам нашим.
По 2-м стихословии седален, глас 5:
Воздержанием житие твое украсивши и плоть Духу покоривши,/ победила еси вражия прилоги,/ во смирении же и пощении Бога взыскавши, богоблаженная.
Слава, и ныне, Богородичен:
Молитвы рабы Твоея Ксении приими, Богородице,/ и избави нас от всяких бед,/ яко родила еси Христа Спаса, Избавителя душ наших.
Величание:
Величаем тя,/ святая блаженная мати Ксение,/ и чтим святую память твою,/ ты бо молиши за нас/ Христа Бога нашего.
Псалом избранный: Терпя, потерпех Господа:
По полиелеи седален, глас 4:
Чудна явилася еси в терпении твоем,/ всячески Христу угодила еси, всеблаженная Ксение,/ мудрою мыслию утвердивши душу твою/ и покоривши Духу плотская мудрования,/ избрала еси добрая, еже Богу работати./ Сего ради Христос дарует благодать и милость молитвами твоими/ чтущим любовию святую память твою.
Слава, и ныне, Богородичен:
Обуревают мя волны греховныя/ и возмущение безместных помышлений,/ умилосердися, Всенепорочная,/ и руку ми помощи, яко Милостива, простри,/ да, спасся, величаю Тя.
Таже степенна, 1-й антифон 4-го гласа. Прокимен, глас 4: Праведницы во веки живут,/ и в Господе мзда их. Стих: Надеющиися Нань разумеют истину, и вернии в любви пребудут Ему. Всякое дыхание: Евангелие от Матфеа, зачало 43.
По 50-м псалме стихира, глас 6:
Житие Твое, яко солнце,/ сердца верных озари,/ и многая к покаянию приведе./ Темже и нас светом невечерним просвети, мати Ксение,/ всечестную память твою почитающих.
Канон святыя, глас 8.
Песнь 1
Ирмос: Воду прошед, яко сушу,/ и египетского зла избежав,/ израильтянин вопияше:/ Избавителю и Богу нашему поим.
Водою крещения омывшися,/ первороднаго греха избавилася еси, мати Ксение,/ и наша сердца слезами покаяния очисти,/ просвещение подающи почитающим святую память твою.
В воде крещения змия лукава потопившая,/ житием твоим страдальческим вражию силу умертвила еси, блаженная,/ от неяже и нам избавитися Спаса умоли.
Воду живую неистощимых даров/ подаде тебе Христос, блаженная мати,/ Егоже нищету вольно возлюбила еси.
Богородичен: Воды покаяния подаждь ми, Пречистая,/ и, очистивши мя от нечистоты греховныя,/ чиста представи, Богородительнице, Сыну Твоему и Богу.
Песнь 3
Ирмос: Небеснаго круга/ Верхотворче, Господи,/ и Церкви Зиждителю,/ Ты мене утверди в любви Твоей,/ желаний краю, верных утверждение,/ Едине Человеколюбче.
Небеснаго круга Зиждителю все житие твое отдавши,/ возлюбила еси Того до конца,/ сподоби и нас молитвами твоими, блаженная,/ любити Господа до конца дний наших.
Небесныя жизни желая,/ в житии твоем вся земная пренебрегла еси,/ сподоби и нас, мати Ксение,/ молитвами твоими Небесныя жизни достигнути.
Небеснаго чертога желающи,/ странническое житие прешла еси/ и ныне со всеми святыми в Небесных чертозех ликуеши.
Богородичен: Небеснаго Творца, Богородице Всепетая, рождши,/ Небес пространнейшая явилася еси./ Нас от пространнаго пути погибельна уклоньши,/ на Небесный путь настави, молюся.
Седален, глас 5:
Яко странница во граде святаго Петра явилася еси,/ благоволением Божиим укрепляема, мати премудрая,/ Божественных даров и чудес удостоившаяся./ Темже, имущи дерзновение ко Христу Богу,/ мир испроси душам нашим и велию милость.
Слава, и ныне, Богородичен:
Мати Пречистая, Граде Божий,/ избави люди Твоя от бед/ и помощь подаждь противитися врагом гордым, да вопием Ти:/ радуйся, Благословенная.
Песнь 4
Ирмос: Услышах, Господи,/ смотрения Твоего таинство,/ разумех дела Твоя/ и прославих Твое Божество.
Услышавши, Ксение, яко Небеса поведают славу Божию,/ отвергла еси суету мирскую/ и в подвизе поста и лишения на земли Бога славити возжелела еси,/ Его же славити и нас сподоби.
Услышавши и уразумевши дела Господня,/ прославила еси Его Божество,/ надеждею и любовию к Нему украсивши душу твою,/ подвиги просветилася еси, блаженная, Божиею силою укрепляема.
Услышавши прещения вражеская и всякия козни от них терпящи,/ непоколебима пребыла еси,/ и нас непоколебимых в добродетелех утверди.
Богородичен: Услыши, Пречистая Владычице, моления наша,/ и избави нас от насилия вражия,/ и глас Христов, призывающий благословенныя в Царство, услышати сподоби.
Песнь 5
Ирмос: Просвети нас повелении Твоими, Господи, / и мышцею Твоею высокою / Твой мир подаждь нам, Человеколюбче.
Просвещахуся вернии людие,/ зряще незлобие и кротость твою, мати Ксение,/ помози и нам, блаженная, подражати твоему незлобию.
Просветивши стезю жизни твоея светом Богоразумия,/ Христа Господа вседушне возлюбила еси,/ сподоби и ны, блаженная Ксение, в сем быти тебе подражатели.
Просвети нас, о мати Ксение, надеждею и любовию ко Господу,/ ныне бо зрящи Христа лицем к лицу, света неизреченнаго наслаждаешися,/ Тому за ны молися.
Богородичен: Просветила еси омраченное естество, Богородице,/ Свет Истинный рождши,/ темже и нас Светом просветивши, от мрачных враг свободи.
Песнь 6
Ирмос: Молитву пролию ко Господу/ и Тому возвещу печали моя,/ яко зол душа моя исполнися,/ и живот мой аду приближися,/ и молюся, яко Иона:/ от тли, Боже, возведи мя.
Молитву, яко источник приснотекущий, ныне изливаеши,/ недужныя исцеляющи, крепость и силу страждущим подающи,/ сподоби и нас молитвами твоими избавитися от всяких лютых.
Молитвою Небесною и по кончине твоей от недуг свобождаеши,/ целительнице безмездная, достойно хвалима еси на земли,/ молися о душах наших.
Молитву нашу приими, мати Ксение,/ да в честный храм твой приидем со тщанием/ и недугов душевных и страстей телесных исцеление скоро приимем.
Богородичен: Молитвою Твоею всемощною, Пречистая,/ избави нас враг видимых и невидимых, от грехов и всякия муки,/ яко рождшая Человеколюбца Бога.
Кондак, глас 3:
Днесь светло ликует град святаго Петра,/ яко множество скорбящих обретают утешение,/ на твоя молитвы надеющеся,/ Ксение всеблаженная,/ ты бо еси граду сему похвале и утверждение.
Икос:
Како возмогу, грешный аз, скверный душею и телом,/ поведати еже во плоти равноангельное житие твое и преславная чудеса?/ Аще убо мнози премудрии не дерзают исповедати/ многаго твоего терпения и смирения и теплыя ко Христу любве,/ но обаче надеяся на твое заступление, о блаженная, вопию ти:/ радуйся, яко везде призывающих тя скоро предваряеши,/ радуйся, яко множество скорбящих обретают тобою утешение,/ радуйся, святая блаженная мати Ксение, граду сему похвало и утверждение.
Песнь 7
Ирмос: Отроцы еврейстии в пещи/ попраша пламень дерзновенно/ и на росу огнь преложиша, вопиюще:/ благословен ecи, Господи Боже, во веки.
Отроки еврейския Ангел от огня неопальны сохрани/ и тебе, Ксение, в странничестем житии укрепи, поющу:/ благословен еси, Господи Боже, во веки.
Детем евангельски подражала еси в житии твоем, стезю тесную прошедши в незлобии,/ темже и нас на подвиг добродетели сея укрепи, поющих:/ благословен еси, Господи Боже, во веки.
Отроком в пещи халдейстей подражающи, Ксение, воспевала еси Христа, давшего ти крепость, темже и мы, чтуще тя, блаженная, со дерзновением зовем:/ благословен еси, Господи Боже, во веки.
Богородичен: Отроковице Дево, простри на нас милость Сына Твоего,/ да кромешныя тьмы избавимся мольбами Твоими, поюще:/ благословен еси, Господи Боже, во веки.
Песнь 8
Ирмос: Победители мучителя и пламене/ благодатию Твоею бывше,/ заповедем Твоим зело прилежаще, отроцы вопияху:/ благословите, вся дела Господня, Господа.
Победительница страстей явилася еси, Ксение,/ лютая искушения вражия побеждающи и непрестанно поющи:/ благословите, вся дела Господня, Господа.
Побеждающи всякия страсти греховныя, ты, блаженная, яко светла звезда явилася еси,/ приводиши бо жены, падшия во грехи, во еже целомудренно жити и в покаянии воспевати:/ благословите, вся дела Господня, Господа.
Победительница греха явилася еси, блаженная мати, благодать Вышняго имущи./ Темже Небесная достигла еси, идеже ныне со Ангелы поеши:/ благословите, вся дела Господня, Господа.
Богородичен: Победе во бранех духовных верным пособствуеши, Пресвятая Дево,/ темже и людем града нашего помощь Твою низпосли, да Тя выну поем:/ благословите, вся дела Господня, Господа.
Песнь 9
Ирмос: Воистинну Богородицу/ Тя исповедуем,/ спасеннии Тобою, Дево Чистая,/ с безплотными лики Тя величающе.
Воистинну разум Христов имела еси, Ксение,/ смирение, кротость, веру несумненну, надежду и любовь, яже к Богу,/ и нас сего сподоби, да с тобою Христа присно величаем.
Воистинну на тебе, Ксение блаженная, исполнися Христово проречение:/ претерпевый до конца, той спасен будет,/ ныне бо со всеми спасенными Христа присно величаеши.
Воистинну никтоже, притекаяй к тебе, блаженная мати,/ тощь благодати Божия отходит,/ еяже и нас исполни, да тя величаем.
Богородичен: Воистинну Богородицу Тя, Дево и Мати Слова,/ Ходатаицу Сущую нам, Солнце Правды возсиявшую,/ вернии, единомудренно песньми величаем.
Светилен:
Якоже солнце светоносно, возсия ныне, блаженная мати, память твоя,/ вся верныя веселящи, иже молитвенно взывают ти:/ молися прилежно спастися нам.
Слава, и ныне, Богородичен:
Державным Твоим покровом, Пречистая,/ нас, рабов Твоих, от наветов вражиих сохраняй всегда невредимых,/ Тя бо Едину стяжахом надежду и утверждение.
На хвалитех стихиры, глас 2:
Неисчерпаема есть благодать, юже от Христа прияла еси, блаженная,/ темже и мощи твоя Божественною силою непрестанно действуют чудесы,/ к ннмже притекающии и имя твое с верою призывающии/ от неисцельных болезней исцеляются./ Еяже молитвами, Господи,/ и нас душевных и телесных страстей свободи, яко Человеколюбец.
В подвизех странствия твоего/ привлекла еси многая души ко спасению,/ сего ради Христос, нас ради странствовавый/ и не имый где главу приклонити,/ знаменьми и чудесы преславными истинно тя украси,/ страннице блаженная.
Добродетели твоя, богомудрая Ксение,/ к вере обращают сердца./ Кто бо, слыша безмерное твое смирение и терпение, не удивится?/ Еще же ко всем кротость и незлобие,/ скорбящим милование и сущим в бедах скорое поможение,/ плавающим немятежное пристанище/ и путешествующим благое поспешение,/ вся боголепно предваряеши, досточудная,/ и ныне неувядаемым венцем увенчана еси от руки Вседержителя Бога,/ Егоже моли спастися душам нашим.
Слава, глас 8:
Днесь град святаго Петра просвещается, мати Ксение, твоими зарями,/ и святый храм Божия Матере Смоленския, цветы украшаемь,/ вопиет ти, угоднице Христова:/ не престай молитися о всех,/ празднующих любовию святую память твою.
И ныне, глас тойже:
Владычице, приими молитвы раб Твоих,/ и избави нас/ от всякия нужды и печали.
Славословие великое.
На Литургии
Блаженна от канона, песнь 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуиа, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя его. Евангелие от Луки, зачало 24. Причастен: В память вечную будет праведник:
Молитва
О, святая блаженная мати Ксение! Под кровом Всевышняго жившая, ведомая и укрепляемая Богоматерию, глад и жажду, хлад и зной, поношения и гонения претерпевшая, дар прозорливости и чудотворения от Бога получившая и под сению Всемогущаго упокоившаяся, днесь же, от славнаго тысящелетия Крещения Руси, Церковь Русская прославляет тя, яко благоуханный цвет.
Предстояще на месте твоего погребения, пред образом твоим святым, яко живей ти сущей с нами, молимся ти: приими прошения наша и принеси я ко Престолу милосерднаго Отца Небеснаго, яко дерзновение к Нему имущая, испроси притекающим к тебе вечное спасение, на благая дела и начинания наша щедрое благословение, от всяких бед и скорбей избавление.
Предстани святыми твоими молитвами пред всемилостивым Спасителем нашим о нас, недостойных и грешных. Помози, святая блаженная мати Ксение, младенцы светом святаго крещения озарити и печатию дара Духа Святаго запечатлети, юныя в вере, честности, богобоязненности и целомудрии воспитати и успехи в учении им стяжати. Болящия и недугующия исцели, супругом любовь и согласие ниспосли, монашествующим подвигом добрым подвизатися помози и от поношения огради, пастыри в крепости духа утверди, Церковь и страну нашу сохрани и всех боголюбивых чад в предсмертный час причащения Святых Христовых Тайн сподоби, ты бо еси наше скорое услышание и избавление, тебе благодарение возсылаем и с тобою славим Отца и Сына и Святаго Духа, ныне и присно и во веки веков. Аминь.
