Служба составлена студентами Санкт-Петербургской Духовной Академии по Месячной и Общей Минее под руководством игумена Софрония (Смука) и одобрена Богослужебной комиссией Санкт-Петербургской Епархии на заседании 22 декабря 2003 года.
НА ВЕЛИЦЕЙ ВЕЧЕРНИ:
"Блажен муж…" - 1-й антифон.
На Господи, воззвах: стихиры на 8: праздника 3 и святыя 5, глас 8.
Господи, аще и креститися претерпел еси плотию, Безгрешне, / свободити мир от греха хотя, / но Бога Тя мы ведуще, славим: // крестився бо, избавил еси от работы души наша.
Господи, егда на Иорданския струи, / воплотивыйся, пришел еси, / да освятиши воду славным Твоим Крещением, / Иоанну Твой верх преклонити изволил еси / и крещаешися от раба, // да спасеши души наша.
Господи, спасти восхотев от лести мир, / егоже создал еси, / из Неискусобрачныя Девы воплотитися изволил еси, / и Адама от тли избавил еси, яко Человеколюбец, / и, крестився же, даровал еси // просвещение душам нашим.
Ины стихиры святыя, глас 2.
Егда Духа светом осияваема богатно, / богатство возненавидела еси, / едино возлюбивши Небесное, / в мученическую крепость яве облеклася еси / и к безмерным болезнем отлучилася еси. / Темже, врага низложивши, / победы исплела еси венцы, // мученице страстотерпице преславная. (дважды)
Егда смрад плоти и греха пламень, / честная, угасила еси / росою Божественнаго Духа, содействующего тебе, / тогда звери обуздала еси посреде судища, / тело твое предавши на раны мужески. / Темже, врага низложивши, / победы исплела еси венцы, // о Татиано Богоблаженная. (дважды)
Слава, глас 5:
Девства твоего красоты восхоте Царь Славы Христос, / яко непорочну тя невесту Себе обручи, совокуплением нетленным: / ибо волею Своею подав доброте твоей силу, / на враги же и страсти непобедиму показа, / претерпевшую раны горькия, и муки свирепыя, / сугубым венцем увязе тя, / и постави одесную Себе яко царицу испещрену. / Того моли мученице честная и многострадальная, Татиано, // певцем твоим спасение и жизнь подати, и велию милость.
И ныне, праздника, глас тойже:
Зрящи Тя естество всякое земнородных нага в водах, / Содетеля. Крещения просяща, / изменяшеся страхом и ужасашеся. / Предтеча же трепетом содержимь бяше, / не смея приближитися Тебе. / Море побеже, Иордан струи возврати. / Горы взыграшася, зряще, / и Ангельския силы удивляхуся, глаголюще: / о, чудесе! Спас обнажается, / одеяти хотя во спасение человеки и обновление.
Вход. Прокимен дне, и чтения 3.
Пророчества Исаиина чтение (глава 43):
Тако глаголет Господь: / вси языцы собрашася вкупе, / и соберутся князи от них, / кто возвестит сия в них? / Или яже от начала, кто слышана сотворит вам? / Да приведут свидетели своя и оправдятся, / и да услышат, и да рекут истину. / Будите Ми свидетели, и Аз Свидетель, / глаголет Господь Бог, и отрок, егоже избрах, / да познаете, и веруете Ми, и разумеете, яко Аз есмь; / прежде Мене не бысть ин бог и по Мне не будет. / Аз есмь Бог, и несть, разве Мене, спасаяй. / Аз возвестих и спасох, уничижих, и не бе в вас чуждий. / Вы Мне свидетели, и Аз Господь Бог. / И еще от начала Аз есмь, / и несть от рук Моих избавляяй; / сотворю, и кто отвратит то? / Сице глаголет Господь Бог, / избавляяй вас Святый Израилев.
Премудрости Соломоновы чтение (глава 3):
Праведных души в руце Божией, / и не прикоснется их мука. / Непщевани быша во очесех безумных умрети, / и вменися озлобление исход их, / и еже от нас шествие сокрушение; / они же суть в мире. / Ибо пред лицем человеческим аще и муку приимут, / упование их безсмертия исполнено. / И вмале наказани бывше, великими благодетельствовани будут, / яко Бог искуси я и обрете их достойны Себе. / Яко злато в горниле, искуси их / и, яко всеплодие жертвенное, прият я. / И во время посещения их возсияют / и, яко искры по стеблию, потекут: / судят языком и обладают людьми, / и воцарится Господь в них во веки /. Надеющиися Нань разумеют истину / и вернии в любви пребудут Ему, / яко благодать и милость в преподобных Его / и посещение во избранных Его.
Премудрости Соломоновы чтение (глава 5):
Праведницы во веки живут, / и в Господе мзда их, / и попечение их у Вышняго. / Сего ради приимут царствие благолепия и венец доброты от руки Господни, / зане десницею покрыет я и мышцею защитит их. / Приимет всеоружие рвение свое и вооружит тварь в месть врагом. / Облечется в броня правды и возложит шлем суд нелицемерен. / Приимет щит непобедимый преподобие, / поострит же напрасный гнев во оружие, / споборет же с ним мир на безумныя. / Пойдут праволучныя стрелы молниины / и, яко от благокругла лука облаков, на намерение полетят. / И от каменометныя ярости исполнь падут грады, / вознегодует на них вода морская, / реки же потопят я нагло. / Сопротив станет им Дух силы / и, яко вихор, развеет их. / И опустошит всю землю беззаконие, / и злодейство превратит престолы сильных. / Слышите убо, царие, и разумейте, / навыкните, судии концев земли. / Внушите, держащии множества и гордящиеся о народех язык, / яко дана есть от Господа держава вам / и сила от Вышняго.
На литии стихира праздника, глас 6.
Ныне пророчески возопиим Господу: / явился еси нам, Спасе наш и Зиждителю, / сокрушил же еси, Слове, / змиев уста во Иордане, яко Щедр, / и ослепленныя светом Твоим, Христе, просветил еси. // Благословен, явлейся Боже наш, слава Тебе.
Стихиры святыя, глас 4:
Девства добротами и мучений кровьми, / душу твою украсивши мученице славная Татиано, / вручилася еси Создавшему, / сохраняющему тя нетленну во век истинно, / о сем ликовствующи с воинствы архангел и ангел, / апостол же и пророк, // и мученик ликостоянии всехвальная.
И к колесам привязаема, и зверьми растерзаема, / и огнем и водою обостривши твой помысл Божественным Духом, / тьмы начальника течении кровными мужески удавила еси, / и востекла еси к разумным чертогом, // вено Жениху твоему дево принесши страдание.
Слава, глас тойже:
Жениха Христа кровию освятившися прехвальная, / твоею кровию украсила еси плотскую одежду. / Темже обоюду просвещшися прехвальная Татиано, / светлого сподобилася еси чертога Его; / Егоже моли от тли и бед избавитися, // верою творящим всечестную память твою.
И ныне, праздника, глас 6:
Иже о Адаме в ризы кожныя / волею иногда облекшийся падением, / в струях Иорданских совлекшеся днесь Крещением Господним, / богословяще со Ангелы, Тому возопием: // благословен, явлейся Боже наш, слава Тебе.
На стиховне стихиры святыя, глас 4:
Мучительскому шатанию и наглому суровству, / помыслом супротивльшися мужемудренно, / будущих предвидящи наслаждение богомудренная, / пребывающее присно во веки неподвижимо: / еже и получила еси, от земли преставльшися к чертогом небесным, // и лику неразоримому, славная.
Стих: Дивен Бог во святых Своих, Бог Израилев.
Царствия благолепие, / и доброту красную видети сподобилась еси Жениха твоего Христа, / украшена ранами твердаго твоего страдания, / и Источнику благих достойно приближилася еси. / Отонуду же божественнаго веселия плод богатно прияла еси блаженная, // и безсмертную славу.
Стих: В церквах благословите Бога, Господа от источник Израилевых.
Ни иго работное, ни слабость женская, / ни глад, ни раны запяша ти мученичестей твердости уподобитися всеславная, / усердием души муки претерпела еси. / Отонуду же получила еси небесный чертог, / и венцем благодати украсилася еси, // предстоящи Зиждителю твоему.
Слава, глас 6:
Одесную Спаса предста дева, / и страстотерпица, и мученицa Татиана, / одеяна добродетельми, непобеждена, / и преукрашена елеем чистоты, и кровию страдания, / и вопиющи к Нему радостно свещу держащи: / воню мира Твоего текох, Христе Боже, / яко уязвихся Твоею любовию аз, / не отлучи мене, Женише Небесный. / Тоя молитвами низпосли нам, // всесильне Спасе, милости Твоя.
И ныне, глас тойже, самогласен:
Воспоим, вернии, / еже о нас Божия благодеяния величество: / о нашем бо прегрешении быв Человек, / нашим очищением очищается во Иордане, / Един Чистый и Нетленный, / освящаяй мене и воды / и главы змиев сокрушаяй в воде. / Почерпем убо воду с веселием, братие: / благодать бо Духа верно почерпающим невидимо подавается // от Христа Бога и Спаса душ наших.
Тропарь святыя, глас 4:
Агница Твоя, Иисусе, Татиана / зовет велиим гласом: / Тебе Женише мой люблю, / и Тебе ищущи страдальчествую / и сраспинаюся, и спогребаюся крещению Твоему, / и стражду Тебе ради, яко да царствую в Тебе, / и умираю за Тя, да и живу с Тобою; / но яко жертву непорочную приими мя с любовию пожершуюся Тебе. // Тоя молитвами, яко милостив, спаси души наша.
Слава и ныне, тропарь праздника, глас 1:
Во Иордане крещающуся Тебе, Господи, / Троическое явися поклонение: / Родителев бо глас свидетельствоваше Тебе, / возлюбленнаго Тя Сына именуя, / и Дух в виде голубине / извествоваше словесе утверждение. / Явлейся Христе Боже // и мир просвещей, слава Тебе.
Если бдение, то на благословении хлебов поем тропарь святыя дважды и тропарь праздника единожды.
НА УТРЕНИ
На Бог Господь: тропарь праздника (дважды), Слава - тропарь святыя, И ныне - тропарь праздника.
По 1-й кафисме седален святыя, глас 5:
Благочестно поработившися Вседержителю, злочестивому же мучителю не поработилася еси честная, но претерпела еси твердо темное заключение, и ран разжжение, и преставилася еси к Богу, богомудрая мученице Татиано. Молися о нас, совершающих память твою.
Слава, и ныне, праздника, глас 4:
Иордане реко, / что удивился еси, зря Невидимаго нага? / Видех и вострепетах, рече: и како бо Сего не хотех устрашитися и зайти? / Ангели Его устрашишася, зряще, / ужасеся Небо, и земля вострепета, / и смятеся море и вся видимая и невидимая. / Христос явися на Иордане освятити воды.
По 2-й кафисме седален святыя, глас 1:
Мучений огнь, духа росою погасила еси честная, и к Свету преставилася еси Божественному и Невещественному, и по кончине блаженней источаеши исцелений капли, Татиано, уставляющи разжжение страстей силою духовною.
Слава, и ныне, праздника, глас 8:
Крещается Христос, просвещаяй мир, / с высоты Отец свидетельствова, глаголя: / Сей есть Сын Мой, в Немже благоизволих, / Того послушайте. / Сей есть просвещаяй вселенную благоутробием Своим, / крестивыйся и спасый яко Бог род человеческий.
Полиелей. Величание святыя:
Величаем тя, / святая мученице Татиано, / и чтим честная страдания твоя, / яже за Христа претерпела еси.
Псалом избранный: Бог нам прибежище и сила. Помощник в скорбех, обретших ны зело. Сего ради не убоимся, внегда смущается земля. Разжегл еси ны, якоже разжизается сребро. Проидохом сквозе огнь и воду, и извел еси нас в покой. Святым, иже суть на земли Его, удиви Господь вся хотения Своя в них.
По полиелеи, седален святыя, глас 4:
Пришедшую Христу волею, и украсившую добродетельми сердце, благолепно воспоим Татиану, верных множество: та бо посрами мучительскую дерзость, и просиявши яко солнце посреде беззаконник, по кончине явися земным подтверждение божественное, вкупе и держава.
Слава и ныне, праздника, глас 4:
Иисус Навин во Иордане реце, преводя люди и Божий кивот, сеннопишет будущее благодетельство: образ бо нам возображения и начертание неложно порождения, таинственное прохождение обоими сеннопишет духом. Христос явися на Иордане освятити воды.
Степенна, 1-й антифон 4 гласа.
Прокимен, глас 4: Дивен Бог во святых своих, / Бог Израилев.
Стих: В Церквах благословите Бога, Господа от источник Израилевых.
Всякое дыхание: Евангелие мученице: Мф. 104 зачало.
Псалом 50.
Слава: Молитвами мученицы Татианы, Милостиве, очисти...
И ныне: Молитвами Богородицы...
Помилуй мя Боже...
Стихира мученице, глас 6:
Одесную Спаса предста дева, / и страстотерпица, и мученица Татиана, / одеяна добродетельми, непобеждена, / и преукрашена елеем чистоты, и кровию страдания, / и вопиющи к Нему радостно, свещу держащи: / воню мира Твоего текох, Христе Боже, / яко уязвихся Твоею любовию аз, / не отлучи мене, Женише Небесный. / Тоя молитвами низпосли нам, // всесильне Спасе, милости Твоя.
Канон праздника первый со ирмосом на 6, глас 2.
И канон святыя на 8, глас 2, творение Игнатиево.
Песнь 1
Ирмос: Глубины открыл есть дно / и сушею Своя влечет / в ней покрыв противныя, / крепкий во бранех Господь, / яко прославися.
Адама истлевшаго обновляет струями Иорданскими / и змиев главы гнездящихся сокрушает Царь веков. Господь, / яко прославися.
Огнем Божества Невещественным / в плоть вещественну одеявся. Иорданскою облагается водою / воплощейся от Девы Господь, яко прославися.
Скверну омываяй человеков, сим очищся во Иордане, / имже, восхотев, уподобися, еже бе пребыв, / сущия во тьме просвещаяй Господь, яко прославися.
Ин Ирмос: Грядите, людие, / поим песнь Христу Богу, /раздельшему море и наставльшему люди, яже изведе из работы египетския, / яко прославися.
Мученическими озарена светлостьми, / чистому предстоиши, мученице, Жениху твоему, / душетленных прегрешений просящи избавитися хвалящим тя.
Богатство тленное, мученице, совершенно пренебрегла еси, / на Небесех нетленное и пребывающее ищущи усердно, / и, радующися, прошла еси мученическое страдание.
К ранам, к болезнем и биением многовидным / безбоязненно, мученице, отлучилася еси: / споспешествующую бо имела еси благодать Спасову и укрепляющую тя.
Богородичен: Источник безстрастия рождшая, / уязвеннаго страстьми. Отроковице, исцели / и огня вечнаго исхити мя, / Едина Богоблагодатная.
Песнь 3
Ирмос: Крепость даяй царем нашим Господь / и рог помазанных Своих возносяй / от Девы рождается, грядет же ко Крещению. / Тому, вернии, возопием: / нестъ свят, яко Бог наш.
Неплодная древле и безчадная люте, днесь веселися, Христова Церковь: / водою бо и Духом сынове тебе родишася, верою взывающе: / несть свят, якоже Бог наш.
Велиим гласом в пустыни вопиет Предтеча: / Христу уготовайте пути / и стези Богу нашему правы соделайте, верою взывающе: / несть свят, якоже Бог наш.
Ин. Песнь 3
Ирмос: На камени мя веры утвердив, / разширил еси уста моя на враги моя, / возвесели бо ся дух мой, внегда пети: / нестъ свят, якоже Бог наш, / и нестъ праведен, паче Тебе, Господи.
Не поколеба столпа твоего сердца стекшее мук треволнение, / утвердися бо на камени любве Христовы, всехвальная, / к Немуже взывала еси: / яко несть свят, паче Тебе, Господи.
Человеческую немощь Понесый, / впери силою немощь твою на некрепкаго змия. / Тем, мученице, на землю низвергла еси, верно зовущи: / яко несть свят, паче Тебе, Господи.
Потоки изсушила еси беззакония струями кровей твоих, блаженная, / сладости же потока ныне наслаждаешися / и во Свете Невечернем обитаеши, зовущи: / яко несть свят, паче Тебе, Господи.
Богородичен: Зачатие и рождество Твое паче слова, / веки бо Создавшего словом родила еси, / Избавльшаго безсловесия мира концы, Отроковице Неискусомужная, / Егоже моли всегда, еже спасти нас.
Кондак праздника, глас 4:
Явился еси днесь вселенней, / и свет Твой, Господи, знаменася на нас, / в разуме поющих Тя: / пришел еси и явился еси, / Свет Неприступный.
Икос:
Галилеи язычестей, Завулонстей стране и Неффалимстей земли, / якоже рече пророк. Свет велик возсия, Христос. / Омраченным светла явися Заря, из Вифлеема облистающая, / паче же из Марии Господь, всей вселенней возсиявает лучи Солнце правды. / Темже, иже от Адама назии, приидите вси, облечемся в Него, да согреемся, / покрывает бо нагия и просвещает темныя. / Пришел еси и явился еси. Свет Неприступный.
Седален святыя, глас 4.
Сугуб совершивши, мученице, подвиг на земли, / сугуб и венец сподобилася еси прияти от руки Жениха твоего: / постилася бо еси, страсти плотския обуздающи, / пострадавши же законно, врага низложила еси. / Темже мольбами твоими спаси ны от напастей. (Дважды)
Слава, и ныне, праздника, глас тойже:
Светом, яко ризою, одеяйся, / струями одевается Иорданскими Христос Бог наш, / свыше свидетельствующу Отцу сопрестольнаго, доле пришедшу Духу славы: / Той есть Просвещаяй и Освящаяй нас.
Песнь 4
Ирмос: Услышах, Господи, глас Твой, егоже рекл еси, /глас вопиющаго в пустыни, / яко возгремел еси над водами многими, / Твоему свидетельствуяй Сыну, / весь быв сошедшаго Духа, возопи: / Ты еси Христос, Божия мудрость и сила.
Очищаемо солнце кто виде, - /проповедник вопиет, - пресветлое естеством? / Да Тебе водами, сияние Славы, Отца образ Присносущнаго, омыю / и, сено сый. Огню прикоснуся Твоего Божества? / Ты бо еси Христос, Божия мудрость и сила.
Яви Божественное, еже име, благоговение Моисей, прилучився Тебе, / яко бо из купины Тя, возгласивша, разуме, абие отврати лице. / Аз же како Тя увижу ясно? / Или како руку положу на Тя? / Ты бо еси Христос, Божия мудрость и сила.
Душевное совершая мудре и словом почтенный, бездушных стыждуся. / Аще бо крещу Тя, клеветна ми есть огнем дымящаяся гора, / побегшее же море на двое и Иордан сей, возвративыйся: / Ты бо еси Христос, Божия мудрость и сила.
Ин. Песнь 4
Ирмос: Пою Тя, слухом бо, Господи, услышах и ужасохся: / до мене бо идеши, мене ища, заблуждшаго. / Тем многое Твое снизхождение, еже на мя, прославляю, / Многомилостиве.
Красно душевное устроение благолепием благочестия Татиана носящи, / еще же мучения светом преславно сияющи, / к чистому Жениху вселяется.
Железом твое лице стружущия пребеззаконныя / невидением Небеснии Ангели мучаху, / посланнии к твоей от Бога, мученице, помощи, / иже твоему терпению удивишася.
Законно Христа проповедающи, победила еси пребеззаконнующия, / жертва же непорочна благоприятна совершеннейшая Тому принеслася еси, взывающи: / Тебе любящи, Спасе, закалаюся.
Богородичен: Ко пристанищу тихому мя направи, Богоневесто Всесвятая: / буря бо мя волнует и смущение греха люте, / ветры колеблемь лукавых духов, оскорбляющих мя.
Песнь 5
Ирмос: Иисус, живота Начальник, / разрешити осуждение грядет Адама первозданного, / очищений же, яко Бог, не требуя, / падшаго очищает во Иордане, / в немже вражду убив, // преимущ всяк ум мир дарует.
Сшедшимся без числа людем от Иоанна креститися, сам посреде их ста. / Провозгласи же предстоящим: / кто показа, непокоривии, гнева вам уклонитися, хотящаго быти? / Плоды достойны Христу сотворите: / Предстояй бо ныне мир дарует.
Делатель и Зиждитель, посреде стояй, яко Един всех сердца испытует, / чистительную же лопату рукою прием, / всемирное гумно всемудре разлучает, неплодие паля, / благоплодным вечный живот дарует.
Ин. Песнь 5
Ирмос: Просвещение во тьме лежащих, / спасение отчаянных, Христе Спасе мой, / к Тебе утренюю, Царю мира, / просвети мя сиянием Твоим: / иного бо, разве Тебе, бога не знаю.
Твою честную и блаженную страсть подражающи, / безстрастием Тебе сочтавшаяся страждет преусердно, / на уды ссекаемая, Жизнодавче Христе, зовущи: / иного, разве Тебе, бога не знаю.
Страх Божий во утробе мыслию приемши, / дух спасительнаго исповедания и мучения / родила еси преславно, доблемудрая, твердым страданием / и сопротивная начала посрамила еси.
Светлыми сияеши зарями, уясняема Духа Святаго светолитием, / и озаряеши верных сердца, греховный мрак разоряющи, мученице, / страстотерпице Христова досточудная.
Богородичен: Светлый Солнца Облаче, осияй ми зарю, / решащу мрак моих прегрешений, / даждь ми руку, впадшему в тину греховную, / воздвигни мя, лежащего. Едина падшаго Адама исправление.
Песнь 6
Ирмос: Глас Словесе, светильник Света, / денница Солнца, Предтеча в пустыни, - / покайтеся! - всем вопиет людем, - и предочиститеся: / се бо предстоит Христос, / от тли мир избавляяй.
Рождься нетленно от Бога и Отца, / от Девы кроме скверны воплощается Христос, / Емуже ремень, яже от нас Слова сочетания, разрешити неудобь, учит Предтеча, / земнородныя от лести избавляя.
Огнем крестит конечным Христос противныя, / а не Бога мудрствующих Его, / Духом же обновляет водою благодати разумливыя Божества Его, / от прегрешений избавляя.
Ин. Песнь 6
Ирмос: В бездне греховней валяяся, / неизследную милосердия Твоего призываю бездну: / от тли, Боже, мя возведи.
На древе яко позна простерта Тя мученица честная, / терпит повешение и строгания телесная / за любовь Твою, Всемощне.
Сверепейшии зверие устыдешася посреде тризнища мужески страждущия тя, / якоже Феклы первее первомученицы, / еяже ревность стяжала еси, приснопамятная.
Представше Небеснии Ангели посреде темницы, тя светом осияша, / от болезней изымающе и яко Божию агницу прославляюще.
Богородичен: От всех родов избра Тя, доброту Иаковлю, / Юже возлюби Творец, Всенепорочная, / и из Тебе, возсияв, явися.
Кондак мученицы, глас 4.
Светло во страдании твоем возсияла еси, страстотерпице, / от кровей твоих преиспещрена, / и, яко красная голубица / к Небеси возлетела еси, Татиано, / темже моли присно за чтущия тя.
Икос:
Уневестевившуюся Христу мучением, Татиану, сошедшеся, почтим достойно: яко да тоя молитвами, душетленныя пагубы избавльшеся, губительства, труса и падежа, житие во смирение препроводим, сподобльшеся со всеми святыми, от века Богу благоугодившими, ходити во свете, и пети с сими: удивил еси. Спасе, Твоя милости всем человеком, верою хвалящим ю. Темже зовем ей: моли непрестанно о всех нас.
Песнь 7
Ирмос: Юноши благочестивыя, пещи огненней приобщившияся, / шумящ дух росный невредимы сохрани / и Божия Ангела снизхождение. / Темже, в пламени орошаеми, благодарственно воспеваху: / препетый отцев Господи и Боже, благословен еси.
Якоже на Небеси, с трепетом и чудом предстояху / во Иордане силы Ангельския, смотряюще толика Божия схождения: / яко Держай превышних вод состав, в водах Плотоносец стояще, / Бог отцев наших.
Облак древле и море Божественнаго проображаху Крещения чудо, / в нихже древний крестишася, исходяще, законнии людие. / Море же бе образ воды, и облак Духа. / Имиже совершаеми, - благословен еси, - зовем, - Господи Боже, во веки.
Вси вернии, в Немже совершение прияхом, / богословяще немолчно со Ангелы, прославим Отца, и Сына, и Духа Святаго: / се бо Троица, Ипостасьми Единосущная, Един же Бог. / Емуже поем: благословен еси, Господи Боже, во веки.
Ин. Песнь 7
Ирмос: Богопротивное веление беззаконнующаго мучителя / высок пламень вознесло есть. / Христос же простре Богочестивым отроком росу духовную, / Сый благословен и препрославлен.
Благомощно непобедимая, сечема, / сосцев отъятие претерпела еси терпеливейше, / огнем же Небесным, мученице, попалила еси чтити не хотящия Бога, / Егоже вся тварь поет, славящи.
В сердцы носящи огнь Божественныя любве, непорочная, пламень попра, / огня подоборабнаго не ужасеся, / отроков образующи древних и мужество и крепость.
Зверей сверепство тебе повинеся, львов зияния невредно преминула еси, / Богу тя прославльшу, Того прославившую, / Егоже страдания твоею исполняющи плотию, всехвальная.
Богородичен: Жизнь Ипостасную нам рождши, смертию смерть яве потребльшую, / страсти умертви плоти нашея верою чтущих Тя, Чистая, / яко Богородицу и Всеславную.
Песнь 8
Ирмос: Тайну преславную вавилонская показа пещь, / источившая росу, / яко струями имяше невещественный Огнь восприяти Иордан / и объяти плотию крещаема Зиждителя, / Егоже благословят людие и превозносят во вся веки.
Отложи страх весь, - Избавитель Предтечи рече, - / Мне же повинися, яко Благому, / Мне приступи, сие бо естеством бых, / Моим повелением покорися и крести Мя, сошедшего, / Егоже благословят людие и превозносят во вся веки.
Глаголы якоже услыша Креститель Владычни, с трепетом длань простирает, / обаче же, рукою коснувся верху Зиждителя своего, Крещшемуся вопияше: / освяти мя. Ты бо еси Бог мой, / Егоже благословят людие и превозносят во вся веки.
Троицы явление во Иордане бысть, / самое бо Пребожественное Естество, Отец, возгласи: / Сей крещаемый - Сын возлюбленный Мой, / Дух же прииде к Подобному, / Егоже благословят людие и превозносят во вся веки.
Ин. Песнь 8
Ирмос: В пещь огненную ко отроком еврейским снизшедшаго / и пламень в росу преложшаго Бога, / пойте, дела, яко Господа, / и превозносите во вся веки.
Удобрившися добродетельми, украсилася еси добротами мучения / и Жениху обручилася еси, паче всех человеков краснейшему, / добротою сияющему безсмертия, Татиано Богомудрая.
С безплотными слугами в темнице Творца славословила еси, / сияющи славою Божественнаго блистания / и всем неприступна пребывающи, держимым тьмою прелести.
Сокрушение твоих удес истни врагов коварства, / кровей течение нечестия лютыя потоки, честная, изсуши, / пучина чудес нам явльшися.
Богородичен: Спаси, ущедри ны, / щедраго Бога нам Спаса рождшая паче слова, / огнепальных помышлений и страстей изымающи зноя Твоими молитвами, / Чистая, Препрославленная.
Песнь 9
Ирмос: Недоумеет всяк язык благохвалити по достоянию, / изумевает же ум и премирный пети Тя, Богородице, / обаче, Благая сущи, веру приими, / ибо любовь веси Божественную нашу: / Ты бо христиан еси Предстательница, Тя величаем.
Давиде, прииди Духом к просвещенным, - / ныне приступите, - пой к Богу, - / верою, - глаголя, - просветитеся! / Сей нищий воззва Адам в падении, ибо Того услыша Господь, / пришед, струями Иорданскими тленнаго же обнови.
Исаия, - измыйтеся, очиститеся! - глаголет, - / лукавствия пред Господем оставите. / Жаждущии, на воду живу идите: / кропит бо водою, обновляя, Христос приступающия к Нему верою / и к животу нестареемому крещает Духом.
Соблюдаемся благодатию, вернии, и печатию. / Яко бо губителя, бежаша порога евреи, древле окровавлена, / тако и нам исходное Божественное сие пакибытия баня будет. / Отсюду и Троицы узрим Свет Незаходимый.
Ин. Песнь 9
Ирмос: От Бога Бога Слова, / неизреченною мудростию пришедшаго обновити Адама, ядию в тление падшаго люте, / от Святыя Девы неизреченно воплотившагося нас ради, / вернии, единомудренно песнъми величаем.
По многих муках мечным тя судом лютый осуждает судия, / еяже восхождению восплескаша Небеснии чини. / Христос же всесильною десницею венча тя, мученице, законно пострадавшую.
Сочтася с мученическими светлейшими стады, / яснейши приближившися Богу, видиши, яже видят Ангели, / яко дева в чертозе водворяешися. Жениха твоего, честная, / молящи, спастися любовию тя почитающим.
Запечатанный источник тя, заключен же оград, / возложение честно и священно, невесту Христову нетленную, / заколение и жертву, агницу и добрую голубицу Владыки всяческих, / Татиано, проповедуем.
Богородичен: Гласы прекланяема тепле Тя молящих, / Едина верных Прибежище, спаси, ущедри, Владычице, / соблюди от вреда и всякаго языков нашествия / верою и любовию присно Тя величающия.
Светилен святыя:
Яко невеста украсилася еси добротою, обручившися Жениху страстьми добротворными: внутрь же чертога световидно, яко избранная вселилася еси, носящи свещу девическую, и ныне царствуеши с Живущим во веки, Татиано, сияющи. (Дважды).
Слава и ныне: светилен праздника:
Явися Спас, Благодать и Истина во струях Иорданских / и сущия во тьме и сени спящия просветил есть, / ибо прииде и явися Свет Неприступный.
На хвалитех стихиры на 6: Стихиры праздника, глас 6:
Сияние от Света, Свет сын, Иисусе мой, / просветил еси нас неизреченным Твоим осиянием, / прежде ослепленныя во Едеме от змия, / во Иордане ныне Свет вси Светом Твоим зряще, верно поем: // благословен, явлейся Боже наш, слава Тебе.
Таинниче и страшных строителю таин, / Предтече радости и Духа самовидче, / крещшагося Слова от тебе, яко благоволи, проси / нам согрешений избавление присно подати, // Емуже поем: благословен, явлейся Боже наш, слава Тебе.
Вознесем, вернии, в разуме сердца, / потецем со тщанием к струям Иорданским, / и увидим Зиждителя, плотски крещаема от Иоанна Предтечи, / и, с ним богословяще, воспоим: // благословен, явлейся Боже наш, слава Тебе.
Стихиры святыя, глас 3:
Страдальческое торжество вернии, / богомудренне совершаемо видяще, / чудному в советех Богу нашему, / благодарственное песнопение воспоим: / невидимую бо державу противныя силы в женстем естестве победи, / и Божественную Свою силу в немощи совершив добромученицы; // тоя молитвами спасает души наша.
Истины чашу от своих кровей страдальческих, / всехвальная мученица Христова Татиана растворивши, / и сию всегда предлагающи Церкви, / в нейже церковныя питомцы мудрости гласом созывает, глаголющи: / почерпите пиво, воскресения свидетельное, / неверных прогонительное и страстей чистительное, / благочестивым же душам хранительно, Спасу зовуще: / напоивый нас потоком сладости Духа, // спаси души наша.
Иже кровию Христовою души запечатовше в день избавления, / кровь святую от мученическаго источника востекающую нам, / с веселием духовным пророчески почерпем, / животочных страстей Спасовых, и присносущныя славы образовательну. / Тем же Ему возопиим: / прославляяся во святых Твоих, Господи, // преславныя Твоея страстотерпицы молитвами спаси души наша.
Слава святыя, глас 6:
Страдальческим шествовавши путем, / мучительскаго избежала еси совета, Татиано, всечестная: / яко дева убо мудра, свешу носящи вошла еси во дворы Господа твоего; / яко мученица мужеством, / благодать прияла еси исцелити плотския страсти. / Но и нас, воспевающих тя, душевных болезней избави, // яже к Богу мольбами твоими.
И ныне, праздника, глас тойже:
О, паче ума Божественнаго смотрения! / Како Творец твари предста и преклоняет сему главу? / Указанием бо нам образ смирения вводит, / иже о Нем просвещенным, / Емуже поем: // благословен, явлейся Боже наш, слава Тебе.
Великое славословие.
Тропарь мученице. Слава и ныне, тропарь праздника.
Ектении и отпуст.
На часех: тропарь праздника, Слава: тропарь мученицы.
Кондаки праздника и святой пременяюще глаголем.
НА ЛИТУРГИИ
Блажены на 8: праздника песнь 7-я, на 4 и святой песнь 6-я, на 4.
По входе, тропари и кондаки:
В храме Господском и в храме Татианы - тропарь праздника, тропарь святыя, Слава - кондак святыя, И ныне - кондак праздника.
В храме Богородицы - тропарь праздника, тропарь храма, тропарь святыя; Кондак храма, Слава - кондак святыя, И ныне - кондак праздника.
В храме святого - тропарь праздника, тропарь храма, тропарь святыя; кондак храма, Слава - кондак святыя, И ныне - кондак праздника.
Прокимен праздника глас 4-й: Благословен грядый во Имя Господне, Бог Господь и явися нам.
Стих: Исповедайтеся Господеви, яко Благ, яко в век милость Его.
Прокимен святыя, глас тойже: Дивен Бог во святых Своих, Бог Израилев.
Апостол: рядовой и мученицы (Рим. зач. 99).
Аллилуйя, глас 4: Принесите Господеви сынове Божии, принесите Господеви сыны овни.
Стих: Глас Господень на водах. Бог Славы возгреме, Господь на водах многих.
Стих: Терпя потерпех Господа, и внят ми, и услыша молитву мою.
Раздел: ИА "Вода живая"
